امتى وازاى تاكلى طفلك؟

إزاي نبدأ نأكل الطفل ونبدأ بإيه؟
_أيا كان العمر اللي هتبدأي تأكلي طفلك فيه فلازم تبدأي معاه بالتدريج وبكميات بسيطة, ولازم تبدأي بنوع خضار واحد تستمري عليه 5 أيام بدون ماتغيريه علشان تشوفي النوع دة هيسبب حساسية للطفل ولا لأ, بعدها تبدأي بنوع تاني تستمري عليه بردو كام يوم بعدها نوع تالت وهكذا.
_تغسلي إيدك كويس جدا وتغسلي الخضار كويس جدا والأدوات اللي هتحتاجيها, وتسلقي الخضار كويس وتضربيه في الخلاط مع مية السلق بتاعته, ويكون في درجة حرارة الجسم يعني يادوب دافي بسيط, وبمعلقة الأطفال أو بمعلقة صغيرة تبدأي تأكليه بعد ماتسمي الله طبعا.
_إبدأي بمعلقتين مثلا بالنهار, وزيهم آخر النهار واستمري يومين على الكمية دي. تالت يوم ممكن تزودي شوية لو حسيتي أن الطفل متقبل الأكل وعاوز تاني.
_وياريت يكون الطفل جعان علشان يرضى ياكل, ويكون مغير الحفاضة ومفيش حاجة مدايقاه, وتلاعبيه وانتي بتأكليه.
_بعد كام يوم ممكن تديله نوع تاني وتفضلي على التاني دة كام يوم وهكذا بنفس الطريقة.
أبدأ بإيه؟
_يفضل البدأ بالخضار وبعد فترة نعطي الطفل الفواكه.
_جميل إنك تبدأي بالكوسة لأنها خفيفة وطعمها حلو, بعدها الجزر(بس ممكن يعمل إمساك فلو عمل مش تديهوله لوحده لأ خليه مع الكوسة) بعدهم بطاطس مسلوقة, بعدين رز, بعدين بسلة, فاصوليا خضرا.
_الفواكه الآمنة اللي نبدأ بيها هي ( تفاح, بطيخ, كنتالوب, جوافة, كمثرى, برقوق, مشمش, خوخ, قرع عسلي, موز)
_من الشهر التامن (برتقال, يوسفي, جريب فروت, أناناس, فراولة, مانجو, رمان معصور ومتصفي, جوز هند, عنب)
_وطبعا تكون عصاير طبيعية تعمليها في البيت مش معلبة, وبدون سكر ولا عسل قبل عمر السنة.

[size=21][ندعوك للتسجيل في المنتدى أو التعريف بنفسك لمعاينة هذه الصورة] طيب إزاي هعرف إن نوع الأكل دة عمل حساسية؟

_ممكن تلاقي الطفل شفايفه إحمرت أو ورمت, ولسانه إحمر.

[center]_ممكن تظهر بقع حمرا في جسمه.
_ممكن يحصل قئ أو إسهال أو إمساك.
وطبعا مش أول ماتحصل حاجة غريبة نقول إن دي حساسية من نوع الأكل دة. لأ إحتياطي توقفي النوع دة وتروحي للدكتور هو اللي يحدد سبب العرض دة.
[ندعوك للتسجيل في المنتدى أو التعريف بنفسك لمعاينة هذه الصورة] حاجات بنديها لأطفالنا في بداية الأكل مع إنها مضرة:
في بعض الأطعمة مضرة للأطفال قبل سن معين, وممكن تكوني بتديها للطفل وانتي مش عارفة زي إيه؟؟
_ على رأسهم الزبادي. عارفة إن كتير هيستغرب لكن فعلا هو مضر وليه مشاكله اللي مش بتظهر دلوقتي لكن بتظهر مع مرور الوقت.
الزبادي مش قبل 9شهور. ويكون زبادي طبيعي اللي من عند اللبان مش المعلب وطبعا بنشيل الوش الدهني منه.
_ السكر مضر جدا للأطفال قبل عمر سنة مفيش نقاش, والعسل كمان, والملح.
_ البيض مش قبل 8شهور.
_ اللبن الحليب والأجبان بعد سنة.
_ البسكوتات والعصاير حتى لو بسكوت سادة, لأنك بتلاقي عليه في مكوناته مكتوب (زيوت نباتية مهدرجة) ودي خطيرة جدا, دة غير المواد الحافظة, إذا كانت هي مضرة للكبار فما بالكم بالأطفال الرضع.

[ندعوك للتسجيل في المنتدى أو التعريف بنفسك لمعاينة هذه الصورة] في نقطة مهمة جدا جدا كل الكلام اللي فات دة مبني عليها:
_ ممكن واحدة شاطرة تقرا الكلام تقوم تقول (طيب ما فلانة بتأكل ولادها كذا وكذا من عمر شهرين ودلوقتي هما زي الفل) وواحدة تقول (دا أنا كنت بشوف فلانة بتلحس ولادها من الطبيخ ومن كل حاجة بتاكلها علشان يعرفوا الأكل من صغرهم ومش يرفضوه بعدين)
_أو واحدة مثلا تشوفك بتأكلي بنتك أو إبنك عنده 5 أو 6شهور أي نوع خضار مسلوق بدون ملح تقولك (حرام عليكي حطيله شعرة ملح, إنتي ممكن تاكلي الأكل ماسخ كدا؟) أو تفاحة مهروسة مثلا تقولك (إيه دة حطيله معاها سكر ولا عسل علشان يرضى ياكلها)
_ أو واحدة تقولك (أنا بدأت بالذبادي من عمر 4شهور وبسكوت مع شاي وموز وعسل) و... و... و... 0
[ندعوك للتسجيل في المنتدى أو التعريف بنفسك لمعاينة هذه الصورة] طيب بالعقل كدا هرد عليكم بكام نقطة:
أولا: ولنفرض جدلا إن الكلام دة صح ودي حاجات مش هتضر, طيب ماهو لو أنا أخرتها شوية عنها بردو مش هيضر ولا إيه؟
ثانيا: ماتقوليش ماهو أنا عاوزة أنوع في الأكل لبنتي, هي لو عمرها 6شهور بس في أنواع خضار وفاكهة كتير هي ممكن تاكلها زي (التفاح, الجوافة, البطيخ, الموز, الكوسا, الجزر, البطاطس ). ولو أكبر من كدا الأنواع هتكون أكتر وأكتر.
ثالثا: ممكن تقولي إبني بيرفض الأكل بدون ملح ولاسكر علشان ماسخ, هقولك أثبت علميا إن الأطفال عندهم حاسة التذوق بتكون قوية جدا في وقت معين بمعنى ( إن حاجة زي التفاح والجزر بيحسها مسكرة بوضوح, ومثلا الكوسا والبطاطس والخضراوات بيحسها مالحة بوضوح, لذلك لو حطيتي ملح أو سكر ولو بسيط جدا هتكون شديدة عليه) إنتي بس حاولي وماتزهقيش هو علشان متعود على طعم لبنك بيستغرب أي حاجة تانية وبيرفضها في البداية, وساعات بيرفضوا دلع.
رابعا ودي مهمة: مش معنى إن في حد كان بيأكل ولاده (لحاجات اللي بنقول عليها مضرة) وولاده كويسين مش معنى كدا إن الحاجات دي آمنة.
1_ مين قالك إن إبنها ولا بنتها كانوا كويسين فعلا أكيد مناعتهم ضعيفة,وبيتعبوا كل شوية, ويمكن جالهم أعراض الحساسية من نوع معين من الأكل وهي ماعرفتش سبب دة أو افتكرتها حاجة تانية.
2_ الأضرار دي مش شرط تبان فورا, لأ دي حاجات بتظهر مع الوقت.
3_ هديكم مثل هو صعب شوية سامحوني, لكن عاوزة أبينلكم خطورة الأمر وإنه مش هين زي ماحنا فاهمين:
إنتوا عارفين إنه من سنين عندنا تلوث في الميا وفي الجو وفي الأكل حتى المزروعات كلها مواد مسرطنة بسبب السماد الفاسد وغيره, والهوا الفاسد بسبب دخان المصانع المضر وغيره وغيره, هو معنى إن أنا شخصيا (عنان) مش عندي سرطان ولا فشل كلوي ولا مرض وحش؛ هل دة معناه إن الحياة بمبي والدنيا بخير ومفيش تلوث في الهوا والميا والأكل؟؟؟
طبعا لأ, لأن فيه مئات الآلاف غيري عندهم فشل كلوي وغيره من الأمراض الوحشة دي حتى إن الأطفال الصغيرين ماللين مستشفى السرطان (ربنا يعافينا)بسبب التلوث. قولتلكم سامحوني على المثل.
[ندعوك للتسجيل في المنتدى أو التعريف بنفسك لمعاينة هذه الصورة]يعني تاني بكرر إن مش معنى إن فلانة ولا علانة أكلت ولادها الحاجات دي وكانوا كويسين إني أعمل كدا.
بالله عليكم يا أمهات ولادنا دول أمانة وأكيد نفسنا يكونوا أحسن ناس صحيا ونفسيا واجتماعيا وكل حاجة, فلازم ناخد بالنا, مش هنخسر حاجة لو نظمنا لهم أكلهم وأخرنا عنهم حاجات قد تكون مضرة ليهم, وحتى لو نافعة تأخيرها مش هيضر.
يعني بالله عليكم إحذروا السكر والعسل للأطفال قبل سنة واللبن كمان والحاجات التانية اللي في بداية الموضوع.
والبسكوت والكيكات (بيكون فيها زيوت نباتية مهدرجة ودي مادة مضرة جدا) والزبادي المعلب زي جهينة وغيره وكل حاجة فيها مواد حافظة, المواد الحافظة دي مواد مضرة ووحشة والله وبيحذروا منها الكبار؛ تيجي إنتي تديها لبنتك اللي بترضع.
يارب تستفيدوا بكلامي ويباركلنا في أطفالنا ويكونوا في أتم صحة وعافية

[/center][/size]

معلومة كدة على السريع.
أختي كانت مرة قالتلي إنها سمعت من الدكتور في التلفزيون: إن الطفل بيميل إما للأكل الحلو , إما للأكل المالح وكان (معاذ) إبنها فعلا بيحب المالح ومش بيحب الحلو.
الموضوع بالنسبة للأطفال الأقل من السنة معناه إن فيهم اللي يحب الجزر والفواكه (هي دي الحاجات الحلوة), وفيهم اللي يحب الخصراوات والحاجات التانية (اللي هي المالحة) يعني مش المقصود اللي عليه سكر أو ملح.
ولاحظت فعلا إن (خديجة) بتحب الأكل الحلو (ماهي بنوتة بقى) بتحب الجزر اللهم بارك وبتشربه بسهولة, واديتها كنتالوب بردو حسيتها حبت طعمه.
وباقي كلام الدكتور: إننا نلاحظ أطفالنا ونديهم الأكل اللي بيحبوه أكتر أو حتى نضيفه على الحاجات التانية كمان.
أنا مثلا لما خدت بالي من ميول (خديجة) الحلوة بقيت أحطلها الجزر مع الحاجات التانية, زي الرز بغسل معلقتين حلو أوي وأحطهم في مية كتير على النار ولما يستووا أحط جزر ويكملوا سوا وكمان الرز يستوي زيادة وبعدين أضرب في الخلاط كالعادة. وكمان بحط كوساية مع جزراية ويتسلقوا وع الخلاط, أو بطاطساية وجزراية وهكذا.
والحمد لله وجود النوع التاني مع الجزر مابيخليش في إمساك.
وقولت كمان إني إن شاء الله هركزلها على الفواكه والحمد لله الصيف دخل والفواكه هتكون وفيرة.
هي دلوقتي بدأت الشهر السابع يعني يناسبها (الجوافة, التفاح, الخوخ, الكنتالوب, البطيخ, الموز)

الحاجات المقلقة جدا وبتشتكي منها الأم: الإمساك عند الطفل.
لكن أولا في حاجة لازم نعرفها :
هناك أعراض غير مقلقة ماقولش عليها إمساك.
_إن الطفل اللي بيرضع صناعي بالنسباله الإمساك العادي يعتبر طبيعي, كذلك الطفل اللي بدأتي تأكليه من فترة قريبة طبيعي إنه يصاب بإمساك كرد فعل من المعدة لتغيير نوع التغذية ودة لفترة وبعدين المعدة بتتعود.
_في كتير من حديثي الولادة بيفضلوا يحزقوا كذا مرة على مدار اليوم .. دة مش معناه إن عندهم إمساك أو صعوبة في الإخراج, لأ دة شئ طبيعي بالنسبة لحديثي الولادة.
_الطفل لو عمل براز 3مرات في الأسبوع دة مش عنده إمساك. (أنا بنتي فضلت حوالي شهر ونص بتتبرز كل 4أيام والدكتور قال عادي طالما البراز سايل مش ناشف, وفضلت بردو حوالي شهر تعمل إسهال 3مرات في اليوم. بردو الدكتور قال طبيعي لأن الطفل لحد 6شهور معدته لسة ماستقرتش على حال. وفعلا راح الموضوع دة ورجعت عادي بدون أدوية).
يبقى كل دة طبيعي ومايقلقش, ومايخليناش نجري ندي الطفل لبوس جلسرين, الجلسرين وحش إلا للضرورة وبوصف الطبيب وبجرعة بسيطة جدا ومابيتكررش.
إمتى أقول إن الطفل عنده إمساك وإيه هي أعراضه؟
1_ الأطفال أقل من سنة اللي بيرضعوا طبيعي فقط لو فات أكتر من 48 ساعة على آخر مرة تبرز فيها.
2_ الطفل أكبر من سنة لو أقل من 3مرات في الأسبوع.
3_ لو البراز ناشف متحجر على شكل كرات, أو على هيئة كتل.
4_ لو الطفل بيتألم عند عملية التبرز.
5_ لو كان البراز معاه دم. (ودة بيكون بسبب تشقق في المستقيم أثناء التبرز).
6_ لو أصبحت البطن قاسية الملمس (يعني ناشفة بسبب إحتباس الغازات).
والنقطتين الأخيرتين لازم إستشارة الطبيب.
بعض الأمور اللي تساعد في التخفيف عن طفلك:
_ طبعا الرضاعة الطبيعية.
_ لو الطفل 6شهور أو أكتر لازم يكون أكل الطفل محتوي على الألياف عن طريق تناول الفواكه والخضراوات والحبوب المناسبة لعمره.
_ لو الطفل أكبر من 8شهور إديله عصير برتقال. وزوديله من السوائل عموما.
_ الدكاترة بينصحوا بعصير الخوخ والمشمش للإمساك, ودة آمن للطفل من 6شهور.
_ حاولي تحركي رجليه بأسلوب الدراجة يعني كأنه راكب عجلة وبيبدل، دة بيساعد في تحريك الفضلات في أمعائه.
_ توقفي عن إعطائه الأطعمة التي قد تسبب الإمساك، زي (الأرز، والموز، والجزر, أو الحبوب).
_ إعملي مساج لبطنه (بزيت جونسون للأطفال أو بزيت الزتون) يعني تحطي كام نقطة على البطن وتدلكي براحة بحركة دائرية. دة بيخلي البطن تتحرك والأمعاء تتنشط.
_ اليانسون المركز والحلبة مفيدين للإمساك (مركز بمعنى إنه بدل معلقة صغيرة على كوب ماء يبقى معلقة صغيرة على تلات اربع كوب).
أكيد إن شاء الله لو عملتي الحاجات دي الطفل هيخف لوحده, لكن بعد الشر لو الموضوع إستمر فترة طويلة يبقى طبعا تروحي تكشفي عليه.
تحذيـــــــر:
من الوصفات اللي بتتوصف لعلاج الإمساك: غمس قطنة في زيت الزتون أو أي زيت وإدخالها (معذرة) في بداية فتحة الشرج, أو دهن فتحة الشرج بالزيت.
الوصفة بتجيب نتيجة فعلا لكن تكرارها مضر جدا جدا, بيسبب زي إرتخاء للعضلات في المكان دة, وعدم تحكم في عملية الإخراج بعد كدة. فياريت ناخد بالنا ونلجأ للعلاج الصحيح