خوافض الحرارة

اول حاجه انواع خافض الحرارة
هما تلات مجموعات
1- باراسيتامول
زي السيتال والبيرال والتمبرا
دي امان من اول يوم للطفل .. ومفيش منها ضرر
وتنفع للاطفال الي عندهم ازمات صدرية عادي مش مضرة ليهم

2- ايبوبروفين
زي الفلابو والبروفين والترافين
دي امان من بعد سن 6 شهور
وده ميزته انه مش بس خافض حرارة كمان هو مضاد للالتهاب

3-ديكلوفيناك
زي دولفين وكاتافلام وفولتارين
ده امان من بعد سن سنه
ومابيستخدمش للاطفال الي عندهم ازمة صدرية لانه بيعمل انقباض ف الشعب الهوائية


في مجموعة رابعه ممنووووووووع استخدامها
4- ساليسيليك اسيد
زي الاسبرين والاسبيجيك والراونال ودولاران
ده ممنوووووع في حالات ارتفاع الحرارة ممنوع منعا باتا لان لو الحرارة دي سببها فيرس مثلا الاسبرين بيعمل معاه متلازمة اسمها متلازمة راي ودي مميته ومالهاش علاج فممنوع منعا باتا

يبقى لو الطفل اقل من ست شهور ... باراسيتامول
اكبر من ست شهور لسنة ... باراسيتامول وايبوبروفين
اكبر من سنه ... ينفعله التلاته باراسيتامول وايبوبروفين وديكلوفيناك

الطريقة المثلى لاستخدام خافض الحرارة هي استخدام نوعين مختلفين مع بعض بالتبادل بمعنى استخدم مثلا الباراسيتامول مع البروفين الاول ادي سيتال وبعد 4 ساعات بروفين وبعد 4 ساعات سيتال وهكذا

خافضات الحرارة كلها مابتشتغلش كويس لو الحرارة عالية اوي عشان كدا لازم انزلها بالكمادات كمان
الطريقة المثلى للكمادات.. نفهم فكرتها الاول فكرة الكمادات اني اعمل طبقة رقيقة من المية على سطح الجسم السخن ده فالمية دي تتبخر بفعل حرارة الجسم فتسحب الحرارة
تبقى بمية من الحنفية مية فاترة مش ساقعه لان الساقعه هتخلي الشرايين تنقبض ومايتبخرش كويس فالحرارة ماتنزلش
ولو حطيت القماشة وسبتها على الجلد انا كدا كتمت المسامات وماديتش فرصة ليها انها تبخر المية
وكمان لو حطيت على راسه بس او جبهته زي مابنعمل... دي مش مساحة كافية للبخر

يبقى مية فاترة من الحنفية
وامسح بالقماشه وخلاص مش اسيبها عليها
وامسح اكبر مساحه ممكنه من الجسم مش الجبهة بس