الفطاااااااااااااااااااااااام

( الفطااااااام )



فطام الطفل ممكن يكون فتره صعبه ومؤثره على الام والطفل لو معرفناش ازاى نتعامل
صح فى المرحله دى
بالنسبه لتجربتى فانا بنتى كانت متعلقه بصدرى جااااااااامد عشان كده قرار فطامها
كان امر صعب بالنسبه ليه
لكن مع الاستعانه بالله والدعاء مرت المرحله دى بسلام الحمد لله

فى البدايه لازم نعرف ان قرار الفطام لازم يكون فى وقت مناسب ، وافضل وقت للفطام فى الربيع او الشتا يعنى
مش فى عز الحر ونفطم الطفل لان هيتعب منك اوى فى الحر الا اذا حدثت لك ظروف
اجبرتك على الفطام فى الوقت ده فيبقى الامر خرج عن استطاعتك
بعكس قرار البوتى اللى قلنا انسب وقت لها الصيف عشان فى البرد ممكن الطفل يتعب
لا قدر الله بسبب البلل

خلاص عقدت العزم ونويت افطمها فى اليوم الفلانى وكان الجو مناسب وسنها كمان كان مناسب للفطام بالاضافه لانها كانت متعلقه بصدرى ومش بتاكل كويس
وحليب صدرى كان قليل فقررت خلاص انى افطمها

قررت يكون يوم الفطام يوم خميس وشغل والدها بيخلص بدرى
عشان استغل الخميس والجمعه فى انه ياخدها منى شويه عشان هتبقى متعلقه بصدرى
يوم الخميس بالنهار بدانا اليوم باللعب والساندوتشات والعصاير وكده
وكل ما كانت بتبكى كنت العب معاها اخليها تلتفت لاى حاجه جديده اشغلها باى حاجه

مرت فترة الصبح وجه وقت الغدا غدتها كويس عشان متحتجش للرضاعه الا دلع بس
وبعدها كل ما تبكى نفس الحال اشغلها باى لعبه
وبعدين نامت شويه بعد الغدا واللعب

فترة المساء بقا ودى اهم حاجه خرجنا واتعمدت فى اليوم ده بالذات انى اموتها من اللعب والتنطيط والمشى وبردو كل ما تبكى عصاير وحليب
ورجعنا من البيت وهى خلصانه من التعب ونايمه على اديه

فترة الليل ودى اهم فتره
نمت جمبها وكل ما كانت بتصحها كنت بعطيها مايه مره /حليب مره /عصاير
طبعا كانت بترفضها وتفضل تبكى كنت باخدها فى حضنى وافضل اطبطب عليها
لغاية لما تروح فى النوم تانى من كتر التعب
وفضلت كده طول الليل ومعلش طبعا بتتعبى فى الفتره دى من الارق والسهر
ومن صدرك كمان بس هقولك ان شاء الله انا عملت ايه لتخفيف آلام تحجر الصدر

كنت باخد شاور فى اليوم كذا مره بمايه دافيه واحاول ادلك صدرى من فوق لتحت
على خفيف خاااالص لان الم التحجر بيكون صعب
وبعدين اعمل كل شويه تدليك للمكان بمايه وملح وكانت بتخفف كتير الحمد لله
من التحجر والالم والحمد لله ماخدتش ادويه ولا اى حاجه تانيه لصدرى

فضلنا كده يومين تلاته بالليل هى تبكى وانا اسهر اطبطب عليها واعطيها
عصير او اى سوايل او مايه
وزوجى ياخدها منى شويه لما تكون متعلقه به جامد
لغاية لما الحمد لله بدات شويه بشويه تنسى
وتتعود بس انها تقوم من النوم تشرب مايه وتنام

فى اول اسبوعين تلاته كان نومها مضطرب وبعد كده بدا يظبط الحمد لله
وبس كده ياقمرات
دى كانت تجربتى فى فطام بنوتى
واختم الموضوع
بنصائح هامه

اختارى الوقت والعمر المناسب لفطام طفلك

لو نويتى على الفطام وبداتى مترجعيش تانى وتعطى للطفل صدرك لانه المره التانيه
اللى هتمنعى فيها عنه صدرك هتكون اصعب بكتيييييير من المره الاولى
اعزمى وتوكلى على الله واصبرى

اياك اياك انك تحطى على صدرك اى حاجه منفره للطفل وتدوقيها له
زى المر/ الصبار /وغيرهم
غلط جدااااااا وبتاثر على نفسية الطفل وعلى اكله بعد كده
والمعلومه دى كنت سمعتها من دكتور كبير متخصص فى الامراض النفسيه

مهما كان تعلق طفلك بصدرك لا اعتقد ان احدا كان مثلى فى هذا الامر
فمتقلقيش واعزمى النيه وتوكلى على الله
وبالدعاء والصبر والاستعانه بالله ربك هيسر امرك
والافضل طبعا التدريج فى الفطام بانك تقللى للطفل عدد الرضعات
وبعدين تفطميه

حاولى متتعصبيش ولا تتنرفزى على ابنك لان ده بيصعب عليه الامر اكتر
وبيترك اثر سئ فى نفسيته
لاحظى انك بتفطميه يعنى بتبعديه عن حاجه كان اقرب ما يكون لها
فبالحب والهدووووء والحنيه والطبطبه قدر المستطاع
الامر هيكون هين عليه ان شاء الله