ازاى تاكلى اليبى من الشهر السادس موضوع مفيد اوى

نبدا بسم الله

تغذية الطفل الرضيع منذ بداية شهره السادس



طبعا يا قمرات خلينا نتفق فى البدايه ان بداية دخول طعام الى طفلك غير الرضاعه الطبيعيه او الرضاعه بالببرونه
بيبدا من الشهر السادس للطفل وده اللى انا عملته مع بنتى الحمد لله
وبدل الطفل مرتاح مع رضعتك او الرضاعه بالببرونه فياريت متستعجليش عليه وتاكليه بدرى لانى بسمع ان فى بعض الامهات بياكلوا اولادهم من الشهر الثالث وبيقولوا عشان الولد يكبر كده بسرعه ويتخن
دا حبايبى اكبر غلط صدقونى وبيسبب اضرار للطفل مستقبلا على الكبد والمعده والصحه العامه للطفل
واستشيرى دكتور ابنك قبل ما تغيرى له النظام فى الاكل ولا تستجيبى للضغوط من الاهل عشان عايزين الطفل ياكل بدرى او بيقنعوك انه لو تاخر عن الشهر الثالث او الرابع فى الاكل يبقى مش هياكل كويس بعد كده عشان لازم يدوق الاكل بدرى بدرى وده ملوش علاقه ابدا بحكاية اضراب الاطفال عن الاكل بعد كده
وهشرح النقطه دى بعد كده ان شاء الله



* يبقى اتفقنا ان الطفل هيعتمد فى اكله من ولادته الى الشهر السادس على الرضاعه من صدرك او من الببرونه

طيب مع بداية الشهر السادس هتعملى ايه ؟
اول حاجه هتحضرى ادوات الطعام اللى هياكل فيها البيبى


اطباق عمليه ملونه مصنوعه من ماده نطيفه امنه عشان صحة طفلك وملاعق كمان ملونه محببه للاطفال



اكواب مخصصه لشرب الاطفال الرضع عشان يشرب فيها المايه والعصائر وهى كمان تكون جميله وملونه وجذابه للطفل



العلب البلاستيك دى مهمه وهنحتاجها عشان هنحفظ فيها اكل البيبى اللى هنعملهوله فى البيت ان شاء الله
ودايما تحتفظى باكل البيبى فى الرف الاعلى من التلاجه


تكونى كمان يا قمرايه محضره عندك شوية برطمانات صغيره زى اللى فى الصوره كده
وتكون نظيفه ومعقمه وهنحفظ فيها هى كمان اكل البيبى فى التلاجه اللى هقولك تعمليه ازاى فى البيت ان شاء الله



شوية بفتات للبيبى جميله ومريحه عشان طبعا هتشوفى الوان الطيف على لبسه لما هيبدا يتعلم الاكل
ويفضل الانواع اللى بتتلزق من الخلف او بكباسيل افضل من اللى بتتربط عشان متخنقش الطفل لا قدر الله


وده مفرش بلاستيك هتفرديه على الارض او على كرسى الطعام بتاع البيبى لما ييجى ياكل
عشان هيبهدل الدنيا ولازم تصبرى عليه لما يوقع على الارض او يوسخ هدومه عشان لسه بيتعلم



الاطعمه الممنوعه عن طفلك حتى اتمامه السنه الاولى

طيب الحمد لله احنا بدانا وحضرنا الادوات اللى هنستعملها فى اطعام البيبى ان شاء الله
بعد كده لازم نعرف
اى هى بقا الاطعمه اللى هياكلها الطفل واى الاطعمه الممنوعه
شوفى حبيبتى فى بعض الاطعمه اللى ممكن تسبب حساسيه للطفل ودى هنمعنها عن الطفل تماما وفى اطعمه مينفعش ياكلها الا بعد سنه زى
الملح والبهارات

كل اكل البيبى فى السنه الاولى هيكون من غير ملح ولا بهارات
ليه ؟
لانهم غلط جدا على صحة طفلك وخاصة الملح لانه بيرهق الكليتين عند الطفل وبيسبب له الجفاف وممكن يكون سبب فى ارتفاع ضغط الدم عنده لا قدر الله بعد مايكبر
وده مش كلامى ده كلام كل الدكاتره

السكر

هو كمان غلط على صحة طفلك فى السنه الاولى
غلط على البنكرياس بتاعه بالاضافه كمان انه بيسبب تسوس الاسنان لطفلك بعد كده
وبالنسبه للسؤال اللى دايما بعض الامهات بتساله وتقولك اصل انا لو محطتيش له فى الاكل ملح او سكر مش هياكل لان طعم الاكل مش هيبقى مستساغ
حبيبتى ازاى الطفل هيفرق اصلا بين اللى عليه سكر او ملح واللى معلهوش وهو لسه بيدوق الاكل لاول مره
انتى اللى بتعوديه على حاجه معينه فعوديه احسن على العادات الصح فى الاكل من البدايه

بياض البيض والحليب البقرى ومشتقاته

طبعا ممنوع تاكلى طفلك بياض البيض قبل ما الطفل يكمل سنه عشان الحساسيه
وممنوع تاكلى الطفل صفار البيض مسلوق نص سوى
او بعد السنه تاكليه البيضه كامله مسلوقه نص سوى عشان بكتريا السلمونيلا
لازم تسلقى البيضه كويس قبل ما تاكليها للطفل
وبالنسبه للبن البقرى غلط انك تعطيه للطفل قبل السنه ده كان كلام دكتورة بنتى
حتى قالت لى ولا زبادى سواء بدسم او خالى الدسم
ومشتقاته طبعا يعنى الجبنه والقشطه وخلافه
وياجماعه الناس اللى بتاكل طفلها الجبنه كيرى وهى مليانه قشطه والطفل لسه عنده 6 شهور غلط خالص وبتسبب للطفل حساسيه مش بتظهر على الطفل دلوقت بتظهر مستقبلا
(فربنا يعافينا ويعافى اولادنا يارب ناخد بالنا الله يكرمكم)

العسل

العسل طبعا متاكلوش للطفل الا بعد سنه لانه فيه بكتريا لو اكلها الطفل وهو عنده اقل من سنه بتسبب له انتفاخ فى الامعاء وممكن تسبب للطفل تسمم لا قدر الله
بعد السنه بتكون امعاء الطفل زى الكبار تقدر تقتل البكتريا دى
فتاكليه لطفلك عادى ان شاء الله بعد السنه وهو مفيد للطفل جدا ويكفى ان الله عزوجل قال عنه (فيه شفاء للناس)

بعض انواع الاسماك كالجمبرى والمحار وغيرها من الماكولات البحريه

حاولى تجتنبى فى السنه الاولى انك تاكلى طفلك الجمبرى والكابوريا والانواع دى من الاسماك لانها ممكن تسبب له حساسيه
واذا كان ممكن تسبب للكبار حساسيه فما بالك بمعدة الطفل اللى لسه مكملش سنه

البرتقال والليمون والحوامض

طبعا الحوامض دى زى الليمون والبرتقال ممنوعه منعا باتا قبل ال6 شهور
وبعد ال6 شهور من الافضل تاجلها الى اتمام السنه
بسبب انها ممكن تعمل حساسيه للطفل وطفح جلدى مكان الحفاض
والحساسيه من الحوامض بتروح عادة بعد اتمام الطفل السنه الاولى ان شاء الله
وكمان خلى بالك من المكسرات عشان لا قدر الله ممكن تسبب له اختناق

دى الحاجات الاساسيه الشائعه اللى ممكن تسبب للطفل حساسيه
وفى كمان ممكن يسبب له حساسيه الفول السودانى والزبده بتاعته وممكن الفراوله كانت بتسبب لبنتى حساسيه وممكن الفول الصويا او القمح
وانتى اللى بتعرفى بنفسك ايه اللى ممكن يسبب لطفلك حساسيه وتوقفيه فورا
لكن الحاجات الاساسيه اللى انا ذكرتها فوق دى متغمريش وتعطيها لابنك قبل تمام السنه لانها غالبا زى ماقلنا واتعمل عليها ابحاث انها بتسبب حساسيه للطفل
لاما بتظهر على الفور او مع تقدم السن

طيب ازاى تعرفى اصلا ان ابنك عنده حساسيه من نوع معين من الاكل


علامات حساسية الطعام


هتلاقى الطفل عنده غازات كتير بيعمل ريح كتير/ عنده طفح جلدى فى جسمه خاصة عند مكان الحفاض / اسهال
وفى الحالات الخطيره ممكن لا قدر الله الطفل ميقدرش ياخد نفسه وتلاقى جسمه كله بقى عامل زى الطمطمايه من الطفح الجلدى

فى حالات الحساسيه دى طبعا على الفور لازم توقفى اى نوع اكل كنت بتاكليه للطفل ولو الحاله صعبه لازم تروحى تكشفى عليه فورا

تقوليلى طب ازاى اعرف انه مثلا الاكله دى بالذات هى اللى سببت له حساسيه ؟
ما هو انتى ياقمر بتجربى طبعا الاكل معاه نوع نوع فى الاول
لمدة اسبوع فبسهوله هتعرفى ان شاء الله اى نوع اللى بيسبب له حساسيه

يبقى كده تمام
عرفنا ايه الاطعمه اللى ممكن تسبب للطفل حساسيه وامتى اعرف اصلا انه ممكن يكون عنده حساسيه من نوع معين من الاكل وحضرنا ادواتنا اللى هنبدا بها عملنا
طيب السؤال دلوقت اى بقا الاطعمه اللى ممكن نبدا بها للطفل وهل هى بتتغير بعمر الطفل؟

نصائح فى البدايه

* طبعا ياقمرات الاكل اللى هنضيفه للطفل جديد ده هيستمر مع الرضعه الطبيعيه او اللى بالببرونه بس كل الحكايه اننا بدانا نخفف رضعه ونحط مكانها وجبة طعام

* الاكل فى البدايه مجرد تدويق يعنى بندوقه من الحاجه ونستمر عليها كصنف واحد لمدة اربع خمس ايام لو مجلوش منها حساسيه نبدا نجرب صنف جديد وهكذا
ولو رفض الاكل فى البدايه ده مش معناه انه كرهه بس ده طبيعى فى البدايه حاولى معاه تانى وتالت ورابع بس لو رفضه النهارده وقفيه شويه وبعدين اعرضى عليه الاكل بعد يومين كده وهكذا

* لو طفلك رفض الاكل متتوتريش وتخافى بدل بياخد الرضعات بتاعته بانتظام سواء كانت من صدرك او من الببرونه
وهى فيها غذائه الصحى حتى تمام السنه
بس حاولى تنوعى طريقة عرضك للاكل وتخليه مبهج والاطباق والملاعق ملونه
واعمليله اشكال حلوه فى الاكل
وطريقه مجربه مع بنتى افتحى له اى كرتون وخليه يتفرج عليه واول مايركز معاه اعرضى عليه الاكل هتلاقيه بيفتح بقه وياكل من غير ما يحس

* طبعا زى ما قلنا مش هنضيف ملح ولا سكر للاكل
* تحافظى دايما ان ادوات الاكل بتاعته تكون نظيفه ومعقمه
* طبعا تحاولى تعملى اكله فى بيركس (قصدى تطهيه يعنى )
وبعدين تعبيه فى البرطمانات الزجاج اللى قلنا عليها فوق
* خلى بالك ان البنجر واللفت والسبانخ ممكن تسبب انيميا للطفل

* حاجه مهمه جدااااااااااا
انك متبدايش تاكلى طفلك غير لما يكون تمام
يعنى لا عنده سخونيه ولا برد ولا مريض
عشان مريتبطش عنده الاكل بالتعب والمرض
حتى الدكاتره بينصحوا لما يكون طفلك مريض بعد ما خلاص اخد على الاكل
فترة مرضه دى ابقى وقفى له الاكل شويه وابقى رضعيه بس

* من الاصح طبعا انك تعملى لطفلك الاكل فى البيت ومتعتمديش على الاكل المعلب
عشان كده محبتش بنتى تاكل لا سيرلاك ولا غيره
كله يتعمل فى البيت انظف واامن

تكملة للنصائح طبعا لما طفلك هيبدا يكبر هتعطيه فرصه انه يعتمد على نفسه وياكل ويشرب بنفسه
وفى بداية تعليمه الشرب هيشرب زى ما قلنا من الكوب المخصص للاطفال اللى بيبقى له فتحه من الجنب بشليموه
وبلاش تعطيه المايه والعصاير فى الببرونه لو بيرضع صناعى عشان ميتعودش على كده ويغلبك عما يسبها
اعطيه بالكوب اللى فيه الشليموه ده وشويه شويه دربيه على انه يشرب من الكوب العادى

* كمان متحاوليش تضغطى عليه فى الاكل لان الطفل بيعاند
ولو انتى اصريتى تعطيه الاكل بالعافيه هيعاندك دايما وهيتعبك فى اكله ، حاولى زى ما قلنا الاكل يكون فى صوره جذابه
وانت دايما تكونى بتاكليه وانتى مبتسمه ، وتكلميه بلغته يعنى تفضلى تقوليله (شوف ياكوكى المكرونه دى جمييييييله اوى
ولما ياكل معلقه طب شوف بقا حتة الفرخه دى عسوله ولذيذه ازاى ... وهكذا
العمليه معلش ياجماعه عايزه صبررررررر
وفترة التسنين بالذات محتاجه صبر منك اوى عشان هيتعبك فى اكله
(ربنا يرزقنا واياكم الصبر ويعنا على تربية اولادنا بالوجه الذى يرضيه عنا)

* طبعا هتعطيه فرصه انه يعتمد على نفسه فى الاكل بس ده مش معناه انك هتسبيه وقت الاكل
لالالالالالالالا
لازم تراقبيه وتاخدى بالك منه من غير ما يحس بك
والاكل اللى زى العنب والزبيب والحاجات اللى ممكن لا قدر الله تقف فى زوره لازم تفتتيها بايديك كويس قبل ما تعطيها له
وكذلك التفاح والجزر والاكل الجامد الغير مطهى
وهقول لك ان شاء الله لو لا قدر الله حصل حاجه من دى لطفلك ازاى تصرفى فى الوقت ده زى ما حصل مع بنتى

* من النصايح المهمه كمان انك تنوعى لطفلك فى الاكل يعنى متفضليش تاكليه جزر مسلوق بس او تعمليله بسكوت بشاى وخلاص
لا حاولى تنوعى فى الاكل له عشان هو اولا ميزهقش ويتعود على مذاق كل الاطعمه وثانيا عشان جسمه محتاج التنويع فى الاكل للاستفاده من الفيتامينات والكالسيوم والحديد وكل المعادن اللى بيحتاجها جسمه فى الفتره دى
وخلى بالك ان انت من دلوقت بتاسسى جسمه وعظمه فلازم تهتمى كويس الفتره دى باكله وكمان لازم تعرضيه باستمرار للشمس عشان عظمه
نص ساعه اللى بعد الشروق ونص ساعه اللى قبل الغروب


فى الشهر السابع
هنبدا نقسم الاكل للطفل على 6 وجبات
الصبح : هتعطيه رضعه اللبن لاما من صدرك لاما من الببرونه
الضحى : هتعطيه رضعته عادى بس اخف من بتاعت الصبح وبعد كده تعطيه على طول وجبة الرز اللى قلنا عليها
الظهر : هتعطيه وجبة الخضار المسلوق او الفاكهه وبعدين ترضعيه بردو حاجه بسيطه
العصر : هتعطيه كمان وجبة فاكهه ( ونوعى بقا زى ما اتفقنا عشان ميزهقش وعشان ياخد الفوايد من كل الاكل ) وبعدين ترضعيه خفيف
العشا : هتعطيه صدرك بس او الببرونه
وكمان رضعه لبقية الليل

فى الشهر الثامن
كده تمام وصلنا للشهر التامن وهيكون خلاص اتعودنا
*على وجبة الارز المدعم بالحديد ونعمله للطفل بلبن
*ووجبة الخضروات المسلوقه ونوعى فيها (جزر /بطاطس /كوسه) وممكن كلهم مع بعض
وفى البدايه بتكون شربة خضار يعنى مخففه بالمايه
بعد كده ممكن تاكليها لطفلك بعد السلق مهروسه
*ووجبة الفاكهه وبردو ننوع فيها يعنى تفاح / مشمش/خوخ
(وافضل فاكهه تبداى بها لطفلك التفاح)
*بالاضافه للعصائر المخففه بالمايه
*وكل ده بجانب الرضاعه الطبيعيه او الصناعيه بشكل اساسى
مع بداية الشهر التامن هنبدا ندخل
اللحوم والفراخ

طبعا هتكون مطهيه مع الخضار ومضروبه فى الخلاط وهدوقى طفلك منها
زى ما اتفقنا معلقه فى البدايه بتزيد بعد كده تدريجيا الى 6 ملاعق
وطبعا الفراخ واللحمه فى البدايه تكون من غير دهن
بعد اسبوعين لما طفلك يكون اتعود على اللحمه والفراخ هندخل
البيض


طبعا زى ما اتفقنا صفار البيض بس
والبياض بعد سنه عشان الحساسيه
وطبعا الصفار يتسلق كويس جدااااااا عشان بكتريا السلمونيلا زى ما قلنا
تهرسيه كويس وتعطيه حته بسيطه وتزيد تدريجيا
ومن غير اضافة ملح ولا بهارات فى كل الاكل
وفى ناس للاسف بتعطى البيض لاطفالها بالكاتشب وده غلط جداااااااا
وبيعمل عفونه فى معدة الطفل

كبدة الفرخه

بتسلقيها عادى وتفتتيها وتعطيها لطفلك بالتدريج

وطبعا اهم حاجه متنسيش تعطى لطفلك
الماء

عشان بدا ياكل واكيد هيعطش
بالكوب بتاعه لغاية لما بالتدريج يتعود على الكوب العادى

فى الشهر التاسع
خلاص الطفل هيكون اتعود على الاكل اللى قلناه فوق
وهنبدا نعمله
بليله بالقمح

طبعا بدوقى الطفل حاجه بسيطه منها الاول عشان تتاكدى من موضوع الحساسيه
لو سبب له حساسيه بتوقفيه فورا
ونسيت اقول لك فوق ان من اعراض الحساسيه كمان الهرش
وبتعمليه عادى زى الرز بلبن تطحنى القمح فى الكبه وتسويه بالمايه
وتضيفى عليه حليب صدرك بعد شفطه او حليب الببرونه وتسويه به
وممكن نضيف كمان
البطاطا الحلوه المهروسه

بردو بالتدريج
وفى الشهر ده بيبدا الطفل يستعمل ايده هو فى الاكل اعطيه بسكوته
وخليه يمصها
موزه وتعطيها له فى ايده يمصها بردو
وتبعيه طبعا

واعطيه المعلقه يحاول ياكل بها ودربيه بالتدريج عشان يتعود على الاعتماد على نفسه والاستقلاليه
وخلى بالك ان اى حاجه بتعمليها معاه بتاثر على شخصيته فى المستقبل
يعنى لو فضلتى تعملى له كل حاجه بيتربى على عدم الاعتماد على النفس
وفى نفس الوقت عايزين موازنه يعنى لا كده ولا كده
تعطيه الاكل ياكل وانتى بترقبيه كويس خاصة فى اول سنتين
لانه لا قدر الله ممكن يحصل له اختناق اى حاجه تقف فى زوره
فتكونى واخده بالك


الشهر العاشر الى السنه
بالاضافه لكل ما سبق هنبدا نعطى للطفل مع بداية الشهر العاشر
السمك

بتقليه او بتشويه ويفضل المشوى فى البدايه
وبعدين تفتفتيه باديك كويس وتتاكدى انه مفهوش عظم
وتدوقى منه الطفل زى ما اتفقنا حاجه بسيطه فى الاول لانه ممكن يسبب له بردو حساسيه
وبعدين تزودى الكميه بالتدريج
وهنبدا بقا نتقل قوام الاكل شويه ونزود الكميه
وكل شهر بنزود عليه اكل الشهر اللى فات
وكده تمام
انتظرونى بقا مع طعام البيبى من سنه الى سنتين

خلاص كبرنا وبقا عندنا
سنه



من سن سنه الى سنتين

تقريبا طعام الطفل هيكون زى طعام الكبار
وهنبدا ناكله كل حاجه كانت ممنوعه عنه فى السنه اللى فاتت وبردو بالتدريج
يعنى العسل /بياض البيض/الملح والسكر والتوابل بس هنحطه بردو فى الاكل على خفيف /البرتقال والحوامض
وطبعا هتبداى تشربيه اللبن البقرى عادى


لاما بدل الحليب الصناعى اللى كان بياخده بالببرونه لاما بجانب حليب صدرك لغاية لما تفطميه
وطبعا الحليب البقرى مهم جداااااا للطفل لانه بيحتوى على فيتامين د والكالسيوم وهى مهمين جدا للعظم
وممكن تبداى تعطى لطفلك الحليب المدعم بالحديد
الدكتور كان قال انه افضل كمان من الحليب البقرى ومهم للطفل عشان الحديد
وكمان عشان ميجيش للطفل انيميا بتركزى على
( اللحوم /الفراخ/الاسماك/الفاصوليا /التفاح/الطماطم /شوربة الخضار /الارز والذره والقمح المدعم بالحديد )

وطبعا هياكل مشتقات الحليب اللى كنا ممنوع عنها (الجبنه المبستره / القشطه /وخلافه)
كنت بخلط لبنتى الجبنه الكيرى بصفار البيض زى كده



ومتنسيش طبعا الزبادى كامل الدسم


ونضيف فى قائمه الوجبات السكريات زى المربى بانواع مختلفه


وكمان عسل النحل مفيد جدااااااا
يعنى نوعى فى وجبة الفطار

وتبداى طبعا تاكليه المكرونه بصلصه عادى مع قطع الفراخ المتقطعه او المفرومه
فى وجبة الغدا



والمكرونه ببشاميل خفيف ومتنسيش السمك
وومكن توست وتحطى على وشه بيض وتسويه
وجبه حلوه وخفيفه للعشا



وكل تقريبا اكلكم فى البيت هيبدا ياكله الطفل بس اهم حاجه
* بكميات مناسبه لمعدة الطفل
* بالتدريج
* تقسميهم على 5 وجبات
(3 وجبات اساسيه +وجبتين خفاف مابين الوجبات الاساسيه )
الوجبات الخفيفه زى
(الفاكهه /العصائر/البسكويت/كورن فليكس بحليب ...)

* ان الوجبات فى اليوم تكون متنوعه وفيها جميع القيم الغذائيه
(سكريات /كربوهيدرات/نشويات/بروتينات /فيتامينات ...)


(( ختاما ))

* موضوع اكل البيبى محتاج لصبرررر وطولة بال واحنا اغلبنا بنكون مستعجلين
فادعى دايما ان ربنا يرزقك الصبر

* لو لا قدر الله حصل للطفل اختناق بسبب اى حاجه اكلها زى ما حصل مع بنتى
ومكنتش عارفه تتنفس وجلدها ازرق وبتحاول تطلع اللى فى بقها مش عارفه
ومش عارفه حتى تصرخ او تبكى
اول ما تلاقى طفلك كده الحمد لله كنت عارفه الاسعاف ده
بتحطى بسرعه بطن الطفل على دراعك وتخفضى راسه لتحت شويه عن جسمه
وبايدك التانيه من فوق على ظهره بين الكتفين تضغطى بكفك 5 ضغطات متتاليه
زى اللى فى الصوره كده


هيطلع اللى فى بقه على طول ان شاء الله
ومتقلقيش لو نزل احيانا مع الحاجه اللى اكلها نقطتين دم لان زوره بيكون اتجرح
ودى فى حالة لو مكنش بيصرخ او بيبكى زى بنتى
لكن لو بيصرخ عادى انتظرى شويه هتلاقيه نزلها

* لو كان طفلك بيرفض الاكل اعرفى السبب ممكن يكون بسبب انه بيطلع اسنان
وفى الفتره دى افضل حاجه تعطيله خبز او بسكوت متحمص يعضعض فيه بيريحه اوى



* ملحوظه هامه جداااااا وكتير من الامهات مش بياخدوا بالهم منها
متخلطيش لابنك الحليب او الزبادى باى نوع فاكهه


لان فى 5 انواع من الاطعمه ممنوع خلطهم مع الحليب منهم الفاكهه والشيكولاته
وبيسببوا للطفل مشاكل اقلها الاسهال واضطراب المعده

* لما يكبر الطفل ويبدا مسالة العناد ورفض الاكل
حاولى زى ماقلنا متجبريش الطفل على الاكل ومتخلهوش يعيش على المصاصات والشيبسى والشيكولاته وجوعيه شويه قبل ميعاد الاكل واعمليله الاكل بشكل ملفت وملون وجذاب

والفاكهه بردو قطعيها على هيئة اشكال ونطفى القشر والبذر


ويارب يرزق كل المسلمين بالذريه الصالحه حسنة الخلق والخلق
ويعنا على تربية اولادنا ويرزقنا الصبر
ويقر اعيننا بهم فى الدنيا والاخره
تم بحمد الله
واسال الله القبول والاخلاص فى القول والعمل
وان ينفع بكل ما كتبت كل ام