الاهتمام بالطفل موضوع مفيد

نبدا بسم الله

اولا : الاهتمام بالناحيه الجسديه للطفل



واقصد بالاهتمام بالناحيه الجسديه للطفل
يعنى الاهتمام باذنه ، بانفه ، بعينه ، بشعره ، بالسره ، باسنانه ، بوزنه ، بطوله
بالصحه الجسديه عموما له

اولا : الاهتمام بوزن وطول الطفل



طبعا كل ام تتمنى لطفلها انه يكون مولود بالوزن والطول الصحى واللى يزيد بعد كده بزيادة عمره
وانا فى مواضيعى اكلمت كتير عن اهمية الوزن فى معرفة امور كتير زى هل الطفل عنده فعلا اسهال ولا ده مجرد فعلا شكل البراز للطفل وحاجات تانيه كتير اكلمنا فيها عن اهمية قياس الوزن ومتابعته لمعرفة هل الطفل مريض او يعانى من اى امراض ام لا ؟

لكن معرفناش طب هو ايه اصلا الوزن الطبيعى والصحى للطفل ؟ وهل هو بيزيد خلال السنتين الاولى من عمر الطفل ام انه ثابت ؟ ولو بيزيد اى هو المعدل الثابت اللى المفروض الطفل يزيده مع تقدم سنه ؟

شوفى حبيبتى بالنسبه للوزن الطبيعى اللى بيتولد به الطفل بيكون مابين ( 3 الى3.5) عند الولاده
بيفقد الطفل حاجه بسيطه من وزنه خلال الايام الاولى من ولادته وبعد كده بيستعيد وزنه الطبيعى تانى
فى العشر ايام الاولى من ولادته

بعد كده انتى مش بتقيسى وزن الطفل ولا طوله كل يوم ولكن مره واحده بس فى الشهر تتاكدى منها ان كل حاجه تمام ، ولو لاقيتى ان طفلك مبيزدتش ولا بيطول بالمعدل الطبيعى اللى هنقوله يبقى فى مشكله عند الطفل
ولازم تكشفى عليه ضرورى

المعدل الطبيعى لزيادة الوزن :
من الشهر الاول الى الرابع بيزيد حوالى 3/4 كيلو جرام فى الشهر الواحد
من الشهر الخامس الى التامن بيزيد حوالى 2/1 كيلو جرام فى الشهر الواحد
من الشهر التاسع الى اتمام السنه الاولى بيزيد حوالى 4/1 كيلو جرام فى الشهر الواحد

طيب جميل ده بالنسبه لوزنه
بالنسبه لطوله بقا
المعدل الطبيعى انه يزيد من الشهر الاول الى السادس 2 سم فى الشهر
ومن الشهر السابع الى تمام السنه يزيد 1.5 سم فى الشهر

يبقى لو الطفل مش بيزيد ولا بيطول بالمعدل الطبيعى ده وبتحسى عليه علامات الاعياء والتعب يبقى لازم
تكشفى عليه ضرورى وتبعى حالته باستمرار
وطبعا الاهتمام بوزن الطفل بيكون عن طريق انك ترضعيه رضاعه جيده وبعد ما يبدا مرحلة الاكل تتبعى معاه برنامج غذائى جيد



ثانيا : العنايه باذن الطفل



طبعا اذن الطفل الرضيع بتكون زى اذن الكبار بالضبط
يعنى بتحتوى على (الصوان ) اللى هى المنطقه الخارجيه ودى بنطفها باستمرار
باستخدام قطعة القطن للبيبى وهو لسه مولود وخلال الشهر الاول
بعد كده بنغسله له كويس مع كل شاور من بره ومن جوه
وتحتوى على ( الاذن الوسطى ) اللى هى عباره عن 3 عظمات تتصل بحلق الطفل عن طريق قناه كلنا عرفنها اللى هى (قناة استاكيوس)
والقناه دى ياقمرات بتكون مختلفه عن الكبار فى انها بتكون اوسع وميلها قليل كمان

عشان كده يا اجمل ام النصيحه المهمه جدااااااااااااا
انك مترضعيش طفلك قدر المستطاع وهو نايم
خليه دايما فى وضع تكون راسه فيه اعلى من جسمه
عشان لا قدر الله ميحصلوش التهابات فى الاذن
بسبب ان اللبن بيتسرب عن طريق القناه دى الى اذنه
زى ما كان بيحصل لبنتى
وكانت درجة حرارتها بترتفع وتفضل تبكى وتصرخ من ودنها
لغاية لما كشفت عليها وعرفت انه غلط ترضعى طفلك وهو نايم
فخلى بالك
وممكن يحصل للطفل كمان اسهال وقئ مع ارتفاع درجة الحراره وصديد فى الودن
بسبب التهاب ودنه
ولو الام مهتمتش ممكن لا قدر الله مع الاهمال يفقد الطفل حاسة السمع

اما بالنسبه لكيفية تنظيف الاذن فزى ما قلنا فى موضوع (العنايه بنظافه البيبى)
ممنوووووووووع نستعمل اعواد القطن فى تنظيف ودن الطفل
عشان لاقدر الله ميحصلش خرق فى طبلة الاذن

امال هنظفها بايه؟
بحته قطنه صغيره ويدوب تمسحى بس من بره كده
ومتقلقيش الشمع اللى بيكون اصفر ده فى ودن طفلك وشكله مش لطيف
بيطرد نفسه بنفسه اصلا مجرد لما طفلك ييجى يرضع او ياكل
او يحرك فكه عموما
وتانى بنبه اهتمى بالتهاب الودن عند الطفل ومتهمليش الموضوع ده ابدااااا



ثالثا : العنايه بعين الطفل


طبعا بالنسبه للاهتمام بنظافة العين فزى ما قلنا بردو قبل كده
بحتة قطنه نظيفه منديه بمايه دافيه ونمسح عين البيبى من جوه لبره
ده وهو لسه مولود وخلال الشهر الاول
ولما يكبر واحنا بنعطيه الشاور بنغسلها برااااحه بمايه دافيه مع وجه الطفل برفق

وطبعا من الاهتمام انك تتبعى لون بياض عينه ولو لقتيه اصفر
يبقى ممكن لاقدر الله يكون عنده الصفره
يبقى لازم تكشفى عليه
وكمان لو لقيتى لا قدر الله صديد فى العين

وغلط تماما انك تحاولى تفتحى عين البيبى بالعافيه لو هو مغمضها
وطبيعى انه بيغمضها كتير فى الايام الاولى لولادته

خامسا : الاهتمام بانف الطفل



طبعا العنايه بجلد الانف من الخارج هكلم عنه ان شاء الله فى العنايه بالجلد

اما طريقة تنظيف الانف من الداخل
فزى ماقلنا بردو قبل كده غلط تماما استعمال اعواد القطن
ولكن بتجيبى منديل نظيف وتمحسى به للبيبى برااااااحه

وفى حالات البرد والزكام
او لو كان الجو جاف زى البلد اللى بنعيش فيها خارج مصر
بالاضافه للعواصف الرمليه المستمره والاتربه
عانت بنتى كثيرا الحمد لله بسبب انسداد الانف المستمر
وده ممكن يسبب للطفل ضيق شديد
وميعرفش لا يرضع ولا ينام
بالاضافه انه ممكن يسبب له التهاب فى الحلق
نتيجة انه مش بيتنفس عن طريق انفه
بيتنفس عن طريق فمه

وفى حالة انسداد الانف دى بتستعملى قطرة الانف
واهم حاجه تكون بتعادل كويس
قطرة الانف دى زى
Rhinomer Baby

بتحطى الطفل على السرير على ظهره وتميلى راسه على جنب
وتحطى القطره
وطبعا القطره دى مش بتساعد على تخفيف البرد لو الطفل عند رشح مثلا
دى مجرد بس بتفتح الانف المسدود
وبتنزل المخاط عشان الطفل يعرف يتنفس صح ويعرف يرضع
فلو الطفل عنده برد بتعطيله علاج للبرد +القطره


سادسا : العنايه بجلد الطفل



طبعا الطفل اول ما بيتولد بيكون جسمه كله متغطى بماده بيضه لزجه كده
دى بعض الناس بتعتقد انها ملهاش فوايد
بالعكس دى لها فوايد سبحان الخالق
لانها بتحافظ على درجة حرارة الطفل وبتغذى جسمه كمان
طبعا عند ولادة البيبى بينطفوا جسمه من الدم والمخاط والسائل الامينوى ده
بفوطه مبلله بماء معقم
وممنوع استخدام صابون ولا لوشن ولا الكلام ده
بعد كده لما يكبر البيبى وبتقع السره بتاعته بنعطيه الشاور بتاعه عادى

ودايما حافظى انه يكون جلد الطفل ناعم بانك تدهنى جسمه باى زيت للاطفال زى جونسون مثلا ،كنت بدهنه لبنتى

وحافظى على جلده كمان من التسلخات الناتجه عن الحفاض
بانك تغيرى له الحفاض المتسخ سريعا وتستعملى كريم كويس للتسلخات والطفح
(ارجعى لموضوع العنايه بنظافة البيبى مشروح بالتفصيل)



سابعا : العنايه بفم الطفل



طبعا لو الطفل بيبكى او بيصرخ حاولى دايما تفتحى بقه وتشوفيه ممكن يكون
عنده تقرحات فى الفم
او ممكن وده المهم انه يكون بيطلع اسنان لاول مره
وده بقا موضوع لوحده
وعايز شرح

اول ما طفلك يسنن هتعرفى على طول لانه هيبان انه

* دايما عصبى ومزاجه متعكر
* دايما بيبكى ومش عارف ينام (نومه مضطرب)
* بيحب يعضعض فى اى حاجه
* بينزل لعاب كتيييييير
* ملوش شهيه للاكل
* وممكن تلاقى عنده كحه
* وبيشد فى ودنه
* هتلاقى اللثه بتاعته ورمه وومكن يكون لونها ازرق شويه
دى اشهر علامات التسنين

اول ظهور لاسنان الطفل الطبيعى انه يبدا من 6 شهور
بس ممكن يتاخر شويه عن كده متقلقيش
وبيكتمل عدد الاسنان اللبنيه اللى هى بتتغير بعد لما الطفل يكبر
حتى تصل الى 20
مابين ضروس وانياب واسنان
لما الطفل يكون عنده سنتين ونص او 3

بعد حوالى 6 سنين بتتغير الاسنان اللبنيه دى بالاسنان الدائمه
وفايدة الاسنان اللبنيه انها تحافظ على المكان ده لحين ظهور الاسنان الدائمه
يعنى لو فى مشاكل لا قدر الله فى الاسنان اللبنيه مش نهملها ونقول ده لسه صغير
لان الاسنان دى هى اللى بيتبنى عليها الاسنان الدائمه للطفل بعد كده

عشان تحافظى على نظافة الاسنان دى وتكون قويه وصحيه
* لازم تهتمى بانك تنظفى المكان ده للطفل قبل حتى ما تطلع له اسنان فيه
ازاى ؟
زى ما كنت بعمل لبنتى
تجيبى دايما قطنه نظيفه وبعد الرضعات على طول تمسحى برااااااحه مكان اللثه لطفلك

* وبعد ما تطلع اسنانه تستمرى فى مسحها له بالقطنه المبلله بالمايه
اوممكن تعطيه سواك طرى يعضعض فيه وفى نفس الوقت بينظف المكان
بس شرط انه يكون طرى يافتوكه وتكون طلعت اسنانه الاماميه خلاص
او تنطفيها له بفرشاه ناعمه بدون معجون

* بداية استخدام الطفل للفرشاه والمعجون
بيكون من السنه الثالثه
3

وبتكون طبعا الفرشاه ناعمه جدا
ودربيه الاول انه يشوفك على طول وانتى بتغسلى اسنانك
عشان يقلدك بعد كده ويتف المعجون مش يبلعه
وبعد كده تغسليها له انتى بنفسك
وبعد كده تدربيه انه يعتمد على نفسه فى غسل اسنانه

طبعا نقطه مهمه جدااااا
بلاش انواع المعجون اللى بطعم الفراوله او الفاكهه وكده
لان ممكن الطفل يبلعها ويفتكرها حلوى
يبقى قلنا الغسل المنتظم للاسنان بيحميها ان شاء الله من التسوس

وكمان حاجه مهمه جداااااا
* انك لازم تشربيه لبن وتاكليه مشتقاته من الاجبان والزبادى وغيره ولازم
طبعا فاكهه وخضروات عشان الكالسيوم المهم لاسنانه وعظمه

*حاولى دايما تحفيزك له ميكنش مرتبط بالشيكولاته والمصاصه والحاجات
اللى بتسوس الاسنان للطفل
خليها جوايز معنويه زى انك دايما تقوليله (شاطر,ممتاز,تصقفى له)
او انك تجيبى له لعبه او تخرجيه خروجه
لكن مش كل حاجه هجبلك مصاصه او شيكولاته لو عملت كده
حفاظا على اسنانه من التسوس

* دايما تعوديه يغسل اسنانه قبل النوم بالذات
ومينمش وفى حلويات فى بقه

اخيرا فى موضوع الاسنان
طبعا احنا اغلبنا بيكون شكلنا كده وولادنا بيطلعوا الاسنان
ومش بنبقى عارفين نعملهم ايه نسكن به اسنانهم

تعالى اقول لك تعملى ايه عشان تخففى عن طفلك الالم وقت طلوع الاسنان
من خلال تجربتى مع بنتى

* وقت لما يبكى من اسنانه اغسلى ايديك كويس وبرااااحه خالص دلكى له مكان السن اللى بتطلع بصبعك دى حركه بتريحه اوى
* كمان حاجه كانت بتريح بنتى انك تعطيه زبادى سااااقع
* وممكن كمان تسكنى مكان الالم بانك تدلكيه بقطعة قطن فيها زيت قرنفل
بيخدر المكان والطفل بيرتاح عليه جامد
وفى منه على هيئة مرهم بيدهن بيتباع فى الصيدليه
* ممكن كمان تعطيه حتة قماشه طريه مبلوله مايه بارده
وابعدى عن العضاضات حتى لو كانت طبيه لانها بتسبب مشاكل للطفل بعد كده
وبتاخر طلوع اسنانه
مردتش اجبها لبنتى
وخلى بالك كمان من انه يعضعض اى حاجه صلبه ممكن تاذى اللثه بتاعته
وفى حاجه كمان كنت قراتها بتريح الطفل بس مجربتهاش لبنتى
انك تمسحى اللثه بتاعته بعصير الليمون

العنايه بعظم الطفل


طبعا اهم حاجه نك تحافظى على عظمه بانك تبعدى عن الاشعه ضرورى جدااااا خلال فترة حملك لانها زى ما احنا عارفين غلط جدااا على عظم الطفل وممكن تسبب له تشوهات لا قدر الله
وكمان اى ادويه فى فترة حملك تكون بحساب وتكون مناسبه للحمل وخاصة اول 3 شهور من الحمل فترة تكوين عظم البيبى

كمان فى حملك لازم تتغذى كويس وتشربى حليب وتهتمى بالعناصر اللى فيها كالسيوم عشان عظمك وعظمه
وبالنسبه للطفل لازم طبعا زى ما قلت فى موضوع التغذيه نعطيه جرعة الكالسيوم من الحليب ومشتقاته
ومن الخضروات والفاكهه

بعد مايشرف بالسلامه عامل الرضاعه الطبيعى مهم جداااا فى بناء عظمه
وبعد ما ياكل تهتمى باكله وبمصادر الكالسيوم بردو فى الحليب وغيره
وطبعا زى ما كلنا عارفين تعريض الطفل للشمس مهم جداااااااا
وافضل وقت كان الدكتور قاله بعد شروق الشمس بنص ساعه وقبل الغروب بنص ساعه
يعنى مش فى عز الحررررر وتعرضى طفلك للشمس
وطبعا انا هنا كمغتربه موضوع الشمس ده صعب ان اعرض بنتى لها باستمرار
فكنت بتابع معاها بفيتامين ( د) نقط (فيدروب )
4 نقط فى اليوم





العنايه بملابس الطفل



تقوليلى وايه اللى دخل العنايه الجسديه للطفل بملابسه
اقول لك ياستى
اولا: لان نوعها اصلا ممكن يسبب للطفل مشاكل فى جلده وانتم عارفين ان جلد الطفل خاصة فى الشهور الاولى بيكون حساس جداااااا
فعشان كده يا اجمل ام لازم نشترى للطفل لبسه خلال السنه الاولى على الاقل
يكون قطن وناعم ومريح لجلد الطفل مفهوش بوليستر
وثانيا : من طريقة غسلها ممكن تؤثر على تنفس الطفل
عشان كده لما تيجى تغسليها
لو طفلك معندوش حساسيه من الديتول زى بنتى
فاغسلى هدومه بالديتول
حاجه بسيطه اوى وتضفيها لهدوم طفلك
خاصة ان هدومهم بتبقى ريحتها صعبه وترجيع وكده
وتشطفيهم كويس جدااااا من الديتول بحيث ريحته متبنش خالص فى الهدوم عشان صدر طفلك
وطبعا مفيش حاجه اسمها داونى ولا الكلام ده نهائى على هدوم ابنك
لانه بيسبب مشاكل فى التنفس للكبار فما بالك بالاطفال الرضع
يدوب تغسليهم بمسحوق غسيل خفيف جدا وبعده بديتول خفيف
وشطف بعدها كويس جدااااااااا
وكده تمااااام

لو عايزه بقا تخلى هدوم البيبى ريحتها تحفه وفى نفس الوقت من غير متحطى له
اى برفيوم
لانه غلط طبعا على صدر طفلك
حتى انا مكنتش بحط لو انا رايحه انيمها او ارضعها

تحطى مع هدومه غلاف صابونه تكون ريحتها جميييييله وفى نفس الوقت هاديه
وانسيها بقا
بتخلى ريحة هدوم البيبى تحححححفه وفى نفس الوقت هاديه وجميله ومتتعبش صدره

اهتمى بتتقيل لبسه فى الشتا ومتعرضيش صدره بالذات انه يكون مكشوف
ولو وقع مايه على صدره على السريع تغيرى له هدومه عشان لا قدر الله
مياخدش نزلة برد


وفى نقط سريعه
* لازم تحتفظى بالادويه بعيده تماما عن ايد الطفل
الادويه اللى بتحتاج حفظ فى التلاجه احفظيها فيها والادويه اللى مش محتاجه فى رف بعييييييييييد خالص عن ايد طفلك خاصة لما يبدا يكبر وايده توصل لكل حاجه

* اتعلمى الاسعافات الاوليه للطفل الرضيع وخدى عنها فكره
زى اللى قلنا عنها فى موضوع شرقة الطفل لما اكل حاجه وقفت فى زوره
او لا قدر الله لو وقع عليه حاجه سخن او لو وقع من على حاجه عاليه
وخلافها عشان تكونى عندك استعداد سريع للتعامل مع اى موقف يقابلك
(وان شاء الله مش تحتاجى لاى اسعاف منهم)

بالنسبه للحاجات الطبيعيه المجربه معى وكانت نتيجتها الحمد لله كويسه
*مع الحروق الطفيفه الدقيق الابيض الباااارد ممتاااااااز تحطي منه على مكان الحرق على السريع
*ومع ارتفاع درجة الحراره كمدات الخل (وممنوع طبعا تحطى تلج على الطفل)
*ومع الشرقه او اى اكل يقف فى زور الطفل
(ارجعى لموضوع التغذيه للبيبى )
*مع نزيف الانف :رجعى فورا راس الطفل لوره +متخلهوش يتكلم+مدخليش اى حاجه
جوه انفه وان شاء الله النزيف لو بسيط هيقف
لو موقفش يبقى على اقرب مستشفى
(وربنا يعافينا ويعافى اولادنا من كل سوء ومكروه)
بس لازم اى ام تبقى واخده فكره سريعه عن الاسعافات الاوليه دى

تمام كده
ندخل بقا على (تنمية المهارات الخاصه عند طفلك)



اولا عايزين نعرف امتى الطفل بيبدا
يبتسم/يضحك/يلمس/يمسك/يفهم /يحبو/يجلس/يمشى/يلعب /يتكلم
وغيرها من المقومات الاساسيه
وازاى تتفاعلى معاها وتنميها عند طفلك

عادة ياقمرات الطفل بيبدا
يبتسم

من الشهر الاول
ههههه طبعا بيحاول يعوض الصداع اللى بيعملهولك

يناغى

من الشهر التالت او الرابع
بتلاقيه بيعمل اصوات اموره اوى زى اغ اغ
هههههه وكلام كتير مش مفهوم
حاولى تتفعلى معاه وتقلديه كانك بتكلميه عشان يحس بالسعاده

ممكن تلاقيه بدا يرفع راسه شويه

من الشهر التالت
وتبدا حركة ايده تركز فى الشهر الرابع


يبدا يتقلب على جانبه

من الشهر الخامس
وهنا خلى بالك ولازم تحوطى عليه كويس فى السرير وتحطى جنبه مخدات بس بعيد عن نفسه ,عشان بيتقلب وممكن يقع من على السرير
حصلت مع بنتى مع بداية تقلبها وكانت لسه حبيبتى صغنونه
بس لانى مكنتش اعرف انهم من بداية الخامس بيبداو يتقلبوا
فلازم تخلى بالك

بدا يقعد

من الشهر السادس تقريبا او السابع

يحبو

من الشهر التامن فخلى بالك ممكن يشد سلك كهربا /دوا /اى حاجه غلط عليه
وممكن يتاخر عن كده يعنى انا بنتى بدات حبو فى الشهر التاسع تقريبا

يقدر يمسك حاجه خفيفه بايده

من الشهر التاسع تقريبا

ويبدا يقف من الشهر العاشر وهو ماسك فى كنبه /كرسى /اى حاجه فى البيت
ومن الشهر ال 11 يمشى وهو ساند على الحيطه /الكرسى /اى حاجه
وعلى تمام السنه يبدا يقف لوحده
وهو عنده سنه وشهر يبدا يمشى


طبعا ياقمرات الطفل ممكن يتاخر شويه عن كده فى كل حاجه من دى
فمتقلقوش
بس اهم حاجه المتابعه المستمره
وممكن الطفل يمشى بدرى ويتاخر فى التسنين او العكس

لكن ازاى نقدر ننمى عنده المهارات دى ونساعده انه يكون عنده تفاعل
وحضور ذهن
* بالنسبه للمس والمسك وشد الذراعين :
ممكن تجيبى له لعبه زى دى فيها العاب ملونه تشده وتجذبه انه يرفع ايده عشان يوصلها سواء المتعلقه فى الكرسى او فى السرير

ودى مفيده اوى اولا عشان هتجذبه لها فتره تكونى انتى مثلا بتعملى شغلك فى البيت
وثانيا انها هتنمى عنده حاسة التامل وهيحاول انه يرفع ايده عشان يوصلها
فتقوى عضلات ايده
وبعد ما ايده تكون جمدت شويه فى لعبه بتصدر اصوات بالضغط عليها
بتكون مفيده له فى السن ده

بالنسبه للجلوس والحبو والمشى :
ولازم مع تنمية المهارات دى انك تهتمى بالاساس وهو (عظم الطفل)
عن طريق الاهتمام برضاعته وبتغذيته وتعريضه للشمس واعطاءه فيتامين د
بعد الكشف عليه الاول
لان الدكتوره هى اللى كانت كتباه لبنتى لانها مش بتتعرض للشمس هنا
فانتى اكشفى على طفلك والدكتور يعطيه اللى يناسبه
بالنسبه للجلوس
ده تمارين بسيط للعمود الفقرى للطفل كنت بعمله لبنتى
انك تقعدى الطفل على رجلك وجسمه كله من وره مسنود عليك
برقبته بظهره بكله
بس مش تعمليه كتير لما تكون راسه لسه مثبتتش عشان غلط على راس البيبى
لما راسه تثبت هتلاقيه بقا خلاص بيقعد لوحده
بالنسبه للحبو
ودى لعبه اموره اوى وهتلاقيه بيحبها
انك تحطيه على كوره كبيره وانتى طبعا مسكاه بايدك
وتدحرجيه عليها
هينبسط بلعبه دى اوى وهتساعديه انه يتعلم الحبو
بالنسبه للمشى
ففيه 3 او 4 حاجات تقريبا كل ام لازم تجبهم لابنها
انا حاولت استغنى عنهم لاضرارهم
(السكاته او اللهايه/المشايه/سرير البيبى/العضاضه حتى لو طبيه)
السكاته عشان الماده اللى بتتصنع منها واضرارها على الطفل
وبتبقى عاده بيتعود عليها وصعب انه يسبها
سرير البيبى وقلنا سببه فى موضوع نوم البيبى
العضاضه لان لها اضرار على الاسنان فيما بعد
وبالنسبه للمشايه

فدى معروف اضرارها على عضلات القدمين عند الطفل
والطفل يمشى بعد كده وهو معندوش توازن فى مشيته كانه مدفوع للامام كده
ومحاولتش اجبر بنتى على المشى
لما كنت بلاقيها عايزه تمشى وفيه اقبال منها
كنت بساعدها بس وانا مسكه ايدها انها تمشى
ولما تحب تقعد اقعدها
يعنى مجبرهاش ابداااا على المشى
ودى حاجه بنصحه بها كل ام انك متجبريش طفلك على المشى اهتمى بس
* بالكالسيوم
* وتعريضه للشمس
* وتغذيته كويس
* ومتجبروش على المشى
* ومتقعدوش فى المشايه
* وفى بداية مشيه متلبسوش شوز تقيل عشان ميعقش مشيته حاجه خفيفه كده
وهو هيمشى ان شاء الله فى ميعاده الطبيعى يعنى على سنه وشهر
او ممكن سنه و3 شهور متقلقيش

تنمية مهارة الكلام

انا كنت معتقده انا الطفل عشان مش بيتكلم وهو لسه عنده شهور ولسه بس بيناغى
يبقى مش مستوعب كلامى وميعرفش ينطقه
لما اتفجات ببنتى وهى اول كلمه تنطقها الكلمه اللى مش باخد بالى منها وانا على طول بغيرلها او انيمها اقولها (ياحبيبى)
فكانت اول كلمه تقولها (بيبى)يعنى حبيبى
كنت سعيده جداااااا وحاولت اكرر على مسامعها كلمات مختلفه ومتنوعه
عشان ترددها
ومن هنا بنصح كل ام انك متستهونيش بالطفل حتى وهو لسه جنين فى بطنك يعنى مش هقول لك وهو عنده كم شهر
لا من قبل كده وهو لسه جنين فى بطنك اقراى قران وسمعيه القران
ولما يتولد بالسلامه دايما خلى بينك وبينه لغة حوار وتواصل
وعبريله عن حبك سواء بانك تضميه لحضنك او تقوليله دايما انك بتحبيه
صدقينى ده بيقوى العلاقه بينكم وهتلاقيه لما يكبر بيبدلك نفس المشاعر
وبيسهل عليه عملية الكلام
بعكس لما تعملى الطفل بعنف او دايما تضربيه وهو لسه صغير
بتبدا تظهر عنده مشاكل التاتاه فى الكلام والجبن وعدم الثقه فى النفس
ودايما يحط صبعه فى بقه خلافا لمشاكل التبول اللااردى

طبعا الطفل اول اربع شهور زى ماقلنا بيناغى
وبيبدا يردد كلمتين تلاته تقريبا على السنه

كنت دايما بحاول اقول لبنتى الحاجه باسمها
يعنى هاتى لى يا بيبى الفرشه من على التسريحه
هاتى لى التليفون من على المكتب
المعلقه من المطبخ
وهكذا
دى طريقه جميله وسهله وعمليه تخلى منها طفلك يعرف الاشياء واسماءها
وفى نفس الوقت يعرف يرددها وكمان بتعلميه النظام
يعنى لازم الفرشه بتكون على التسريحه وهكذا

معتمدش خلال العامين الاولين على الكرتون وانى اشغلها به
لانى سمعت من كتير الامهات انهم بيعملوا كده مع اطفالهم
وده بياخر للطفل النطق وتعلم مهارة الكلام
كنت بشغله احيانا حاجه بسيطه جداااا لما تكون مش بتاكل
فكنت اشغله يلفت نظرها واول ما تبدا تركز معاه ااكلها
هههههههه (بضحك عليها يعنى)

من اهم النصايح
انك متردديش كلام طفلك بمعنى لما يقول كلمه بطريقته المكسره
متكرريش الكلمه زى ماقالها ولكن صحيحها له
زى مثلا بنتى بتقول (توته)اقولها قطه
(ماااااااء )اقولها سماااااااااء
يعنى تصحيح لها الكلمه عشان بالتعود هتقولها صح

كمان عودى نفسك انك تقوليلها الحاجه باسمها الحقيقى
يعنى متقوليش لها على المايه (امبو)
عايزه امبو ياحبيبتى؟
لا قوليلها تشربى (مايه)حبيبتى
عامليها كانها واحده كبيره بالضبط فى مسالة المسميات
عشان تتعود تقول كل حاجه باسمها صح
وبعدين اصلا كلمة امبو اصعب من كلمة مايه
بس احنا لنا شوية عادات غريبه كده ههههههه
وقال ايه فاكرين اننا بنسهل على الطفل الكلام وهو اذكى مننا

طبعا الطفل ممكن يتعلم قراءة القران من سنه ونص سنتين
شرط انك تسمعيه على طول القران وتقرايه امامه باستمرار

نمى مهاراته
( باللعب )



واللعب عادة فى السنه الاولى بتبقى شخشخيه /لعب ملونه تجذب انتباه/لعب بتعمل صوت
واللعبه المفضله عند الاطفال وهم عندهم شهور انك تخبى وشك بايدك
وتقوليلهم بخخخخخ وتلاقيه بيضحك ويقهقه وممكن تزغزغيه بالذات من بين رجليه
(هههههه اطفال بقا)

وكمان بيحبوا الكور الملونه


وعربيه صغيره يلعب بها وتعلميه ازاى بتمشى على الارض



وتخلى بالك فى فترة ال 3 سنين الاولى من اللعب اللى بتتفك لحاجات صغيره ممكن تتبلع دى غلط تماما ان الطفل يلعب بها

فى السنه التانيه
نبدا نغير اللعب بلعب تناسب سنه
واهم حاجه زى ما اتفقنا انك تشاركيه اللعب
زى مثلا كنت بجيب لبنتى الكره ودايما مع بداية اى لعبه جديده مش تجبيها وتسبيها له وخلاص لا حاولى تشاركيه اللعب بها خاصة لو لسه لعبه جديده وتعرفيه بيتلعب بها ازاى فتجيبى الكره وترميها لها وتقولها شوفى بتتحدف ازاى وتطلبى منه يحدفها لك
وهكذا
لعبه جميله وشيقه والاطفال بيحبوها اوى


وممكن تلعبى معاه الاستغمايه
بانك تختفى ورا حاجه وتطلبى منه انه يدور عليك
لعبه ممتعه بنتى بتحبها اوى
(وبتهبطنى هههههه)
او لعبة فقاعات الصابون او العروسه
ولعبه كمان كانت بتحبها
تعلميه اسماء اجزاء جسمه يعنى تقوليله دى انفك ده شعرك وهكذا
وتساليه بقا فين شعرك ؟ طب فين ايدك ؟ وهكذا

لعبه زى العجله الصغيره وتركبها تلف بها فى البيت
وفى نفس الوقت بتقوى عضلات رجلها


بس تكون طبعا مناسبه لجسمها وتراقبيها فى اول مرات لغاية لما تتعود عليها

مكعبات ملونه وعليها اشكال
وتقوليلها دى مثلا قطه وبتعمل نيوووووو
ودى ديك بيعمل كوكوكو
وهكذا


وطبعا الالعاب الاكبر من كده زى تركيب المكعبات نفسها وعمل اشكال بها
وعمل اشكال بالصلصال وتمييز الالوان ولعبة ادوات المطبخ للبنات وغيرها من الالعاب
فدى لطفل فى سن 3 سنوات فما فوق

اخيرا علمى طفلك الاداب العامه والاسلاميه على وجه الخصوص

لا تستهونى بطفلك فاول عامين هم اول بناء لشخصيته
نحن نغفل كثيرا عن هذه النقطه ظنا منا ان الطفل اول تعامل معاه لما يدخل الحضانه
وده خطا
الطفل بتتبنى شخصيته من يوم لما كان جنين فى بطنك
فعصبيتك وانفعالك وحزنك وفرحك واضطرابك بينعكس عليه

عودى نفسك دائما ان اى خلاف بينك وبين اى احد لايراه طفلك
خاصة لو كنت بتنفعلى او يعلو صوتك
لان ده هينعكس على شخصيته ويصبح عصبى سئ المزاج ينفعل من اقل شئ
وصوته عالى

منذ نعومة اظفار الطفل لا تعلميه الاداب بانك تقوليله اليوم حصة اداب
وهنتعلم فيها كذا وكذا
انتى بالنسبه لطفلك كتاب مفتوح بيتعلم منه كل شئ
فلما ايدك تتخبط وتقولى (الحمد لله)
بيتعلمها منك
لما تيجى تاكلى وتقولى (بسم الله) هتلاقيه بيرددها
لما تصلى هتلاقيه لما يكبر شويه بيقلدك ويقف جمبك ويعمل كانه بيصلى
لما تنامى لما تخرجى كل حاجه بيشربها منك طفلك
كمان اربطيله دايما بين سماع الاذان وترديده
ولما يبدا يتعلم الاكل علميه يمسك المعلقه باليمين
وانه يسمى الله وهكذا

لازم تربى الطفل انه يبقى اجتماعى بانك تخليه يلعب مع اطفال من سنه
ويعطيهم من الاكل اللى معاه عشان تنمى عنده صفة الكرم من صغره
اقراى له دايما من صغره القصص واربطيه بالقراءه
وعوديه دائما على
(النظام /النظافه /الاعتماد على النفس)
النظام فى كل حاجه من وهو كان لسه عنده سنه
كل مهيشوفك بتنظمى البيت وكل حاجه فى مكانها هيتعلم منك النظام
لما تلعبى معاه باللعب واخر اليوم تنظميها وتحطيها فى مكانها هتلاقيه بقا بيقلدك
واطلبى انتى كمان منه كده
يعنى قوليله يلا ياحبيبى لم اللعب فى مكانها
ولم تكونوا راجعين من بره حط يلا يابيبى حط الشوز بتاعك فى مكانه وهكذا
مجرد تنظيمك (لرضعته/لنومه/لاستحمامه/لحتى الخروجات )
كل ده بيعلمه النظام وان كل حاجه لها وقتها

النظافه طبعا بانك تحافظى على نظافته ويعرف ان فى روتين يومى لازم يعمله
يقوم من النوم يغسل وشه وايده واسنانه
بعد ما بيخلص الاكل
وبعد ما ييجى من بره وهكذا

اخر حاجه الاعتماد على النفس
يعنى مش كل حاجه تعمليها له عوديه يمسك المعلقه بنفسه لما يكون عنده
سنه ويمسك الكوب ويشرب لوحده
وبردو يقلع بنطلونه ويلبس حذائه وهكذا
مره فمره والتربيه عايزه صبررررررررر
وكل حاجه ان شاء الله بالاستعانه بالله والحب والصبر هتهون

وبس كده ياقمرات