البريوش يجنن

خبز البريوش

النهارده هنقدّم لكم وصفة خاصة جداً ، وهي طريقة عمل خبز البريوش..
يلّا بقى بسرعة ندخل على المطبخ ونشوف الطريقة مع بعض...

المقادير
كيلو دقيق
كوب إلا ربع لبن
كوب سكر
8 بيضات
كوب وربع زبدة
معلقة كبيرة خميرة
1/4 كوب زيت
معلقة فانيليا

الطريقة
1- دوبي الخميرة في شوية مية دافئ وسكر، وسيبيها لمدة 10 دقايق علشان تتفاعل.

2- اضربي الزبدة مع السكر كويس لغاية ما الخليط يبقى عامل زي الكريمة، وبعد كده ضيفي البيض واحدة واحدة، واضربي كويس لغاية ما يتجانسوا وبعد كده ضيفي الفانيليا.

3- أحضري الدقيق وانخليه كويس، وبعد كده ضيفي إليه الملح، وبعد كده ضيفي الدقيق تدريجياً على خليط البيض، وبعد كده ضيفي الخميرة، واعجني المقادير كلها مع بعض كويس لغاية ما تحصلي على عجينة متماسكة ولينة.

4- ضعي العجين في طبق عميق، وغطيه وسيبيه يتخمر لمدة ساعتين.

5- قسمي العجين لكرات صغيرة، وشكليها زي ما إنتِ عايزة، وممكن تقسمي العجين لشرائط مستطيلة، وضفري كل شريطتين مع بعض، وممكن تحطي في الوسط بيض مسلوق ملون أو غير ملون.

6- ابدئي في رص وحدات العجين في صينية مدهونة بالزبدة، وبعد كده ادهني وش العجين بصفار بيض مخفوق، وممكن تحطي كمان سمسم على الوش.

7- بعد كده غطي الصينية، وسيبيها تتخمر مرة تانية لمدة ساعة أو ساعة ونصف.

8- دخلي الصينية في فرن درجة حرارته 180 درجة، وسيبيها لمدة 25-30 دقيقة أو لغاية ما تحسي إنه استوى، وبعد كده طلعيه وحطيه في طبق التقديم، وبالهنا والشفا.

وفي النهاية نتمنى إن الوصفه تعجبكم