اكل الرضع من مواقع اجنبية

سمعت دكتورة على قناة صحتي بتقول ان الأكل يبقى بعد مالطفل يتم 6 شهور وبتقول انا فرحانة ان في امهات كتير بقت عارفة يعني ايه رضاعة طبيعية مطلقة ومنظمة الصحة العالمية بتوصي بالرضاعة الطبيعية المطلقة أول 6 شهور وشرحت أن معدة الطفل بتبقى زي الشبكة المخرمة والحاجة الوحيدة اللي بتملى الخروم دي هي لبن الأم فقط وان اي حاجة غير لبن الامل بتدخل بتاخد مكان لبن الام في تكملة الاخرام دي وتعمل مشكلة حتى لو على المدى البعيد

وبصوا بقى الاعشاب دي مصيبة وغلط جدا وعلى فكرة هتلاقوا الكلام ده ابتدى يتنشر في مراكز الصحة وانتو بتطعموا العيال يفط كبيرة بتقول الرضاعة المطلقة اول 6 شهور بدون اي سوائل اضافية والبدأ بالاكل في اول السابع

وطبعا في ناس قليلة لسه بتقول على موضوع اربع شهور وعرفت ان حكاية 4 و6 شهور دي بمنتهى البساطة ان معدة الاطفال بتكتمل ما بين الرابع والسادس فبما أن كل واحدة مش عارفه هو طفلها هتكتمل معدته امتى بظبط فالأحوط اننا نستنى للسادس عشان ميحصلش مشاكل في المعدة والجهاز التنفسي والمناعة على المدى الطويل

المهم بنتي وزنها قليل وكل شوية اكتشف سبب جديد وبحاول اظبط الامور وهي دلوقتي قربت تخلص الخامس فالمهم كله بيضغط عليا اني ااكلها فانا قولت ادور في الموضوع ده واعرف هل اقدر اجازف واكلها دلوقتي ولا استنى وااكلها ايه وكده لأن فعلا وزنها اقل من الطبيعي ومعدل الزيادة بطئ جدا

وطبعا مش هلاقي اجابات لأسألتي في مكان افضل من المواقع الاجنبية ودورت كتير وفهمت حاجات كتير

اولا هو فعلا كل المنظمان الطبية بتوصي بان الاكل يفضل بعد تمام السادس وطالما الطفل بيرضع كويس وبيزيد بشكل كويس يبقى الافضل الانتظار لكن لو في مشكلة زي عند بنتي كده ممكن نبدر شوية مع ان ابو صاحبتي وهو دكتور اطفال بيفضل ان لو في مشكلة نكمل بلبن صناعي مع الطبيعي لغاية السادس وبلاش الاكل لكن انا خايفة من الصناعي ليكون متعرض لحاجة ولا كده فبقول ااكلها احسن

المهم لازم يكون في علامات ان الطفل فعلا مستعد للبدأ في الاكل

ومنها انه يكون تخلص من رفض اي حاجة بلسانه في فترة كده عند الاطفال وانا فعلا حسيتها مع بنتي بعد مكانت مدمنة للسكاتة لما عرفت انها غلط جدا وقفتهلها لما تمت شهرين كده بعدها وهي في الرابع مرة بنجرب نديهالها هي والبيبيرونة اعدت تزقهم بلسانها دلوقتي فعلا سبحان الله لما بديها البيبرونة هي مش بتمص صحيح لكن على الاقل بتاخدها مش زي الاول فانا قولت يبقى دي واحدة من العلامات اللي بيقولوا عليها

تاني حاجة انك تحسي انه بدأ مثلا يصحى بليل اكتر و يرضع اكتر من الطبيعي بس هنا بقى في نقطة انهم بيقولوا ان موضوع ان الطفل يرضع اكتر من الطبيعي دي مش في كل الاوقات معناها انه مستعد للأكل ساعات بتبقى في زي هوجة نمو كده فيها الطفل بيرضع طول الوقت واكتر من الطبيعي بكتير ودي غالبا بتحصل ما بين التالت والرابع وشهور تانية بعد كده لكن المهم انك لما تلاقي كده في الفترة دي متتسرعيش وتقولي ده مش بيشبع مني وكده يبقى مستعد للأكل لا استني اسبوعين كده ورضعيه بتكثيف زي مهو عايز المفروض الهوجة دي هتروح ويرجع يرضع طبيعي لو استمر يبقى فعلا مستعد ياكل ومحتاج الاكل

تالت حاجة انه لما يشبع منك يسيب صدرك او البيبرونة لو بيرضع منها معنى كده انه بيقدر ينظم اكله ويقدر يقول امتى انا شبعت مش بياخد عمال على بطال لا ابتدى يقدر ينظم نفسه ويعرف امتى يوقف رضاعة

رابع حاجة بقى انه يقدر يعد ويثبت راسه بدون مساعدة عشان يقدر يهضم الأكل

خامس حاجة انه يركز في الاكل ويحب يحط كل حاجة في بقه ودي برضه نقطة مش اساسية اوي لأنه ساعات بيحب يبص لكل حاجة او بيحط كل حاجة في بقه لأنه بيكتشف العالم في المرحلة دي ببقه

خامسا يكون وصل لضعف وزن الولادة

لكن برضه مع كل ده الافضل لو الامور ماشية كويسة ووزنه كويس وبيزيد بانتظام اننا ننتظر لتمام السادس تجنبا لأي مشاكل عشان فعلا تكون معدته اكتملت ويقدر يهضم كويس وكل طفل له اسلوبه محدش يقول مهو ابن فلانة كل في الرابع ولا ابن علانة كل في السادس الاحوط والاصح الانتظار للسادس لما يخلص وده كلام د.رفعت الجابري اللي بيجي على الحياة كمان

تاني حاجة بقى يا حلوووووويييين هو اننا نبدأ بأيه اصلا خصوصا لو اضطرينا نبدأ قبل السادس

اولا مش شرط نبتدي بالحبوب زي الارز والقمح لا بيقولوا افضللللل حاجة الافوكادو والموز والبطاطا تخيلوا وبعديهم التفاح لكن التفاح يستحسن لو كان اورجانيك اما الموز والافوكادوا قشرتهم سميكة فمش لازم اورجانيك وان كنت انا بفضل اجيب اي حاجة لبنتي في السنة الاول اورجانيك عشان تتأسس صح والموز والافوكادو مش بيستووا طبعا تاخدي قطعة وتهرسيها بالشوكة وتأكليها للطفل بس بيقولك ميكونش الاكل الصلب والطفل ميت من الجوع لا يكون يعني راضع شوية عشان مش هيقبل الاكل لو كان ميت من الجوع

وفي حاجة سمعتها من دكتور رفعت برضه هي انك تديه الاكل على طرف لسانه مش جوة لأن مجسات التذوق بتبقى ع الطرف وطبعا يا جماعة البداية بتبقى من معلقة لتلات معالق صغيرة مرة او اتنين في اليوم بس طبعا نبتدي بالتدريج انا شخصيا قررت ادي لبنتي افوكادو من بكرة ان شاء الله بس هبتدي بنص معلقة مثلا

واهم قاعدة هي قاعدة الاربع ايام ودي عرفتها برضه من المواقع دي ومن كتاب د.شروق الهيتمي كمان وهي انك لما تبتدي تأكلي طفلك تبتدي بنوع واحد بس لمدة اربع ايام وفي المواقع الاجنبي بيقولك لو بدأتي قبل السادس يبقى تخليها اسبوع يعني تعدي اسبوع تدي نفس الحاجة متغيريش عشان تتأكدي انه مجلوش حساسية منها او اي مشاكل في الهضم ولا امساك وميبقاش التجربة دي بليل لا الصبح او نص اليوم عشان لو حصلتله مشكلة من الاكلة متبقاش بليل عشان ميعدش يتعذب ومينمش وكده وتقدري تتعاملي مع المشكلة براحتك وزي مقولنا يكون بعد رضاعة

بس اهم حاجة بيقولك يكون الطفل المفروض ابتدى يعد لوحده ويثبت رأسه لوحده ولو لسه ميقدرش يبقى لسه مش مستعد للأكل لأنه لازم يبقى منتصب عشان ميشرقش ولا كده وممكن مساعدة كرسي أكل، انا مش عارفة بقى مجربتش ااعد بنتي لوحدها هشوف بكرة كده لأني لسه كنت بقرأ الحاجات دي دلوقتي

برضه بيقولك الاكل ميكونش بديل ابدا للرضاعة يعني متفكريش لما تأكليه وجبة الساعة تلاتة مثلا انه كده خلاص مش محتاج رضعة دلوقتي الا لو الاكلة فيها لبنك زي الحبوب وكده ودي اساسا المواقع دي كاتبة طرقها في البيت بدل منجيب سيريلاك وهيرو والحاجات المصنعة دي اللي عليها مشاكل كتير واصلا بيقولك عشان يقدروا يحافظوا عليها مدة طويلة بيشيلوا القشر من الحبوب دي اللي اساسا فيها كل الفيتامينات والالياف المفيدة

وطبعا تبتدي الاكل بمعلقة لطيفة بلاستيك ولو الطفل رفض ممكن تغسلي صباعك كويس وتديله الاكل بيه ومتجبريهوش ع الاكل لا استني براحة لما يفتح بقه وياكل براحته ولما خلاص يرفض توقفي متكمليش غصب عنه طالما شبع عشان متعمليلوش مشكلة في التحكم في شهيته

ان شاء الله المرة الجاية هكملكوا حاجات كتير عن كل مرحلة اكل وازاي نعمل حاجات زي سيريلاك في البيت مضمونة وسهلة اوي واكلات كتير وكمان هنزلكوا جدول تتابعي بيه اكل الطفل وكل اكله ابتدتيها امتى وعملته مشكلة ولا ايه وهكذا

متنسوش تدعو لبنتي ربنا يقويها كده وتتغذى كويس لأنها بتعيط كتير ووزنها قليل

» وصفات اكل الرضع من عمر 3 شهور الى 12 شهر
» مواقع لابنتك وبنتك حيفيدوهم جدا
» ملابس للأطفال الرضع لحد السنين
» جدول اكل الرضع من 4 شهور لسنة
» مواقع اسلاميه