نوم ابنك الرضيع

اولا : مكان نومه
طبعا كل ام جديده بتقول يعنى ايه مكان نومه ؟
اكيد هنيمه فى سريره طبعا وهشترى له كمان سرير امور زى ده



انا كمان كنت بقول زيك كده
بس بالاضافه ان الظروف الماديه ساعتها مكنتش تسمح
عرفت كمان ان وقته مش دلوقت
بمعنى انه مينفعش تنيمى طفلك فى سرير منفصل عنك
تقولى امال امتى ممكن ينام لوحده ؟؟
اقولك بعد 3 سنين
ايووووووووه بالضبط كده
متستغربيش
ده مش كلامى
تعالى شوفى بنفسك احدث دراسه جديده فى طب الاطفال الرضع

وجدت دراسه جديده ان صحة قلوب الاطفال بحاجه لان يناموا الى جانب الام حتى سن الثالثه على الاقل
وذكرت (دايلى ميل ) ان الباحثين فى جامعة (كيب تاون)
وجدوا ان نوم الطفل وحيدا فى سريره يجعل ساعات نومه اقل ويجهد قلبه اكثر ممن ينامون فى حضن امهاتهم
وقال العلماء ان نوم الاطفال وحيدين يجعل الرابط مع الامهات اصعب ويضر بنمو ادمغتهم مما يؤدى الى سلوك سئ لهم خلال نموهم

وقال الطبيب المسئول عن الدراسه (نيلز بيرغمان ) انه ينبغى من اجل نمو امثل وصحى للمواليد ان يناموا على صدور امهاتهم فى الاسابيع الاولى
من الحياه
واضاف انه بعد ذلك ينبغى ان ينام المواليد الى جانب الامهات الى عمر الثالثه

عشان كده ياقمرات فى تجربتى الخاصه مع بنتى انا استغنيت خالص عن السرير الصغير بتاعها وكنت بنيمها جنبى عشان دايما تحس بوجودى جنبها وعشان الرضاعه خاصة فى الشهور الاولى بتبقى باستمرار وانتى نايمه
وبعد ما برضعها كنت بنيمها على صدرى فاكرين لما شرحت لكم الطريقه
وقلت لكم انها مكنتش بتستريح ولا تنام غير وهى على صدرى كده
حتى موضوع المغص كان بيخف بفضل الله وانا منيماها على صدرى كده


واول ما كنت بحس انها تاهت فى النوم بخدها براااااااحه وانيمها جنبى على السرير

هتقوليلى طيب وهى مش ممكن لا قدر الله يحصل لها اختناق او اى حاجه وهى نايمه جنبك او وانت بتتقلبى ؟
شوفى حبيبتى مسالة التقليب دى اطمنى منها خالص انت اصلا نومك بيبقى خفيف خالص لما البيبى يشرف
بالاضافه انك بتبقى عامله احتياطك بحيث تحطى البيبى جنبك وتبعدى عنه اى مخده او لعبه او اى حاجه ممكن لا قدر الله تاذى نفسه او تسبب له اختناق وتبقى لفاه كويس ومغطياه بحيث ان الغطا يكون تحت ايده وبعيد خالص عن نفسه
زى الطفل اللى فى اول صوره فوق بس طبعا الطفل اللى فى الصوره فوق كاجول شويه
والكلام ده يا اجمل ام لما الطفل يكون كبر لكن وهو لسه مولود وخلال الشهور الاولى مش بيتقلب اصلا
فمتخافيش عليه ان شاء الله اهم حاجه ظبطى له بس انت المكان جنبك
والبطانيه او الغطا اللى انت بتتغطى به تحطى طرفه تحتك يعنى متسبيش طرفه مفرود خصوصا من الناحيه بتاعت طفلك عشان نفسه
وبس كده كل حاجه هتبقى تمام

وعشان اطمنك اكتر اقراى معى باقى كلام (بيرغمان )
وقال بيرغمان انه عندما يختنق الطفل او يعانى من الموت المفاجئ فان ذلك ليس بسبب وجود الام بجانبه وانما لاسباب اخرى
مثل (رائحة السجائر/الوسادات الكبيره/الالعاب الخطيره/والدخان السام)
وقد اجريت الدراسه الجديده على 16 مولودا
ناموا الى جانب امهاتهم ووحدهم فى الاسره
وتبين ان قلوبهم تتعرض للاجهاد 3 مرات اكثر عندما ينامون فى اسرتهم وحدهم
كما ان نوم الطفل وحيدا يجعله يعانى من تقطع فى النوم

كده تمام يبقى ان شاء الله تنيمى طفلك جنبك وانت مطمئنه ان ده الافضل لك وله
مع عمل الاحتياطات اللازمه اللى اتكلمنا عنها
طيب ده بالنسبه لمكان نومه
اى هى بقا فوايد النوم بالنسبه له

ثانيا : فوائد النوم للرضيع
فاكرين امهاتنا كانوا دايما بيوصونا بايه
بيقولوا دايما نيمى الطفل عشان يكبر
دى مقوله صحيحه مايه فى المايه
عارفين ليه ؟
لان الطفل بيخزن الرضاعه اللى بيرضعها وبيحولها لطاقه للنمو
فبيساعد جميع خلايا الدماغ والجسم على التكاثر بسرعه فائقه

طب وقلة النوم او زيادته ممكن يكون له تاثير على الطفل؟
غالبا زيادة النوم الغير طبيعى معناه ان الطفل بيعانى من مشكله او ممكن مرض معين ولازم تكشفى عليه ضرورى وتبعى حالته مع الدكتور
واما قلة النوم واللى كانت بتعانى منها بنتى فدايما الدكاتره يقوله لو مش ماثر ده على صحة الطفل ووزنه بيزيد خلاص يبقى تمام
بس حاولى انتى تنظمى له نومه ويرشدوك لبعض النصايح اللى تساعدك انك تنيمى طفلك وتعوديه على نوم مستقر هذكرها بعدين ان شاء الله

جميل
تقوليلى طب هو اصلا مفروض ينام كم ساعه فى اليوم
يعنى كم عدد ساعات النوم الطبيعيه بالنسبه للطفل

ثالثا : عدد ساعات نوم الطفل
*فى بداية ولادته هتلاقى نومه مش منتظم وممكن ينام من 18 الى 20 ساعه
*لما يبقى عنده شهر ممكن ينام من 16 الى 20 ساعه موزعه على مراحل
ممكن المرحله تصل من(3 الى 4 )ساعات دون التفريق بين الليل والنهار
*الشهر التانى من 16 الى 18 ساعه متقسمه من (5 الى 6 )ساعات فى الفتره الواحده
*الشهر التالت من 9 الى 10 ساعات ليلا من (5 الى 6)ساعات على 3 مرات خلال اليوم
*الشهر الرابع من 9 الى 12 ساعه ليلا
*الشهر الخامس والسادس والتاسع وممكن الى الشهر ال 11
11 ساعه ليلا مقسمه على مرتين
*الشهر ال 12 حوالى 11 ساعه ليلا
ساعتين ونص على مرتين خلال اليوم (4-6)ساعات على ثلاث مرات خلال اليوم

رابعا : طريقة النوم
يعنى ايه ؟
يعنى باختصار طفلك بينام ازاى
ياترى على بطنه زى الكتكوت ده


ولا على ظهره
زى عمنا الكاجول ده




طبعا اى طريقه بيرتاح لها الطفل فى النوم اكيد هى الافضل خاصة لو كل ما تغيرى له النومه بتاعته دى يقلق ويقوم من النوم واحنا مبنصدق انه ينام
لكن فى نفس الوقت بلاش النومه اللى على البطن بمعنى انك مش انتى اللى تعوديه ينام على بطنه وتصرى على ذلك ظنا منك انها افضل طريقه
لا بالعكس دى نومه غلط للبيبى امال تعملى ايه ؟
اقولك لما بينام على صدرك ويتوه خلاص فى النوم شليه برااااااحه وحطيه جنبك على السرير على جنبه اليمين لو اتعود على كده يبقى ممتاااااااز
انا كنت بعمل كده مع بنتى تفضل شويه على جنبها اليمين وبعدين ممكن تتقلب وتنام مثلا على ظهرها
وبالاستمرار والتعود هتخليه ينام على جنبه اليمين بالذات لما يبدا يكبر وتعرفيه ان دى سنه عن الرسول صلى الله عليه وسلم
وطبعا معلوم اضرار نوم الطفل على بطنه خاصة بعد الرضاعه او لساعات طويله
بعكس ما بعض الامهات بتعتقد ان النوم على بطنه هو الصح


اخيرا نصائح لنوم هادئ ومستقر لطفلك

1- طفلك على ماتعوديه
بس ده لا ينطبق على طفلك فى اول 3 شهور لانه فى الشهور الاولى دى لا يميز بين الليل والنهار ونومه بيكون كتير صحيح بس متقطع لانه بيصحى كل ساعتين تلاته تقريبا عشان يرضع ومفيش اى طريقه لمعالجة الموضوع ده غير انك تنظمى انتى موضوعك نومك عليه لكن مع الوضع فى الانتباه انك خلال ال 3 شهور الاولى دى بتعوديه انه بعد كده لما هيميز الليل من النهار ينام بالليل ويصحى بالنهار
فهتعملى ايه عشان ده
* لما ترضعيه فى النهار ترضعيه فى الضوء وتلعبى معاه وتنغيه وتكلميه
*والعكس بليل اما تيجى ترضعيه رضعيه على وناسه او من غير ضوء خالص وطبعا مفيش اى اصوات شغاله جنبه ومتلبيش معاه ولا تناغيه
كل ده عشان تعوديه ان الليل معناه سكووووون وهدوووء ونوووووووم وان النهار وقت النشاط واللعب والحيويه
حتى لما تغيرى له الحفاض بليل يبقى بهدووووء والنور مطفى وعلى السريع كده قبل ما يصحى ولو حتى قلق ولا بدا هيعيط سبيه شويه متشلهوش على طول ممكن يرجع فى النوم تانى لكن لو شلتيه هيصحى وهيفوق


2- نظمى انت الاول مواعيد نومك:
لما هيبدا ان شاء الله يدخل الشهر الرابع هيكون ميز كويس بين الليل والنهار بس لو انت نومك ملخبط وبتعكسى نومك بحيث تنامى النهار وتصحى الليل هيبدا يتعود معاك على النوم بالشكل ده وهيحصل له نوم متقطع وغير منتظم
فلازم انتى الاول يكون نومك مظبوط وصحى عشان تعوديه عليه
وطبعا فى فترة الاربع شهور دى زى ما اتكلمنا قبل كده غالبا معظم الاطفال بتعانى من المغص وبيقلق نومهم فارجعى لموضوع المغص وشوفى الطرق اللى ذكرناها فى طريقة تخفيف المغص عند طفلك ليعود للنوم مره اخرى

3- بعض الامور اللى ممكن تساعده على النوم
* دلكى برااااحه سلسلة ضهره من فوق لتحت
*افضل طريقه اللى كنت بستعملها مع بنتى دايما خاصة اول شهور انيمها على صدرى واخلى جسمى يلامس جسمها وامرر ايدى على شعرها وظهرها وانا بقرا لها قران بصوت هاااااااااادى خالص ومنزلهاش من على صدرى غير بعد مترووووووح فى النوم خالص
وفى اطفال متنمش غير على الاصوات العاليه صوت غساله او مكنسه شغاله
وفى مينمش غير بالمشى والطبطبه عليه
يعنى شوفى انت طفلك بيرتاح على ايه من الوسائل دى ونيميه بالطريقه اللى يرتاح عليها (بس خلى وسيلة المشى دى اخر حاااااااااااجه لانها متعبه اوى لك)

4- لما طفلك يبدا يكبر بقا عوديه ينام فترة الظهر
هتساعده على النوم المستقر بليل ومتنيمهوش قبل المغرب عشان يعرف ينام بليل
وعرضيه بالنهار للهواء الطلق والعبى معاه لان معروف ان الهوا الطلق بينهك الطفل ويخليه ينام
ولو نام بالظهر هيعرف ينام ان شاء الله فترة الليل كويس بعكس اللى يقولك متنيمهوش بالنهار عشان يعرف ينام بالليل
ده كلام غلط لانه لو منمش بالنهار شويه بيبقى بليل متعب وبالتالى نومه بيبقى متقطع وبيقلق كل شويه

5- اعطيه حمام دافى قبل النوم
زى ماقلنا فى موضوع نظافة البيبى انك لما تعوديه على الشاور الدافى ده قبل النوم اولا بيلطف جسمه ثانيا انت كده بتعوديه وتربطيه ان الشاور بعده نوم
مع ببرونه من الاعشاب الطبيعيه زى الشمر او البابونج او اليانسون
هتساعده ان شاء الله ان ينام نوم متواصل

وبس كده ياقمرات
واهم حاجه الدعاء والاستعانه بالله والصبر
وربنا يربى لنا اولادنا ويجعلهم قرة عين لنا فى الدنيا والاخره