تنظيف الحمام

ازاى تنضفى حمامك

نضافة يومية ودورية

اولا الحمام ده اكتر مكان مينفعش ابدا يبقى متوسخ لانه واجهة البيت نضافته بتقول ان ست البيت دى نضيفه او العكس وكمان ده مفروض للتطهر مش لغممان النفس والاشمئزاز

اول حاجة تمسكى الحوض لو فوقيه مرايه لازم تمسحيها وتلمعيها بجلانس ولو فوقيه رف فضى كل اللى عليه وادعكيه ب ليفة ناعمة مع جنرال او اى سائل تنظيف ونقطة كلور
والصبانة اوعى تنسيها شيلى كل الصابون اللى لازق فيها وادعكيها وادخلى بقى على الحوض ادعكيه ولمعيه برضه هما والحنفيه
واياكى تدعكيهم بليفه استانلس لانها هتجرح الحوض ولا بسيلك المواعين لانه بيتفتفت وبيعمل صدا
لو للاسف الحوض مليان ترسبات يبقى بسلك استانلس بس براحة خالص علشان ميتخدش
كده خلاص رجعى الحاجة فوق الرف ولمعيها ولو حاجة خلصانة او ملهاش لازمة ارميها

تعالى بقى على التواليت نفسه هاتى نفس الليفه وادعكى بيها السيفون وضهر الغطا والحواف واشطفيهم ونضفى كمان حوالين القاعدة من تحت اوعى تنسيهم
وبعد كده بفرشاه التواليت ادعكى من جوة وةحطى كلور زيادة وسائل تنظيف ومتنسيش الحته اللى تحت لانه للاسف بتبقى غامقه جدا عند ناس كتير وعليها ترسبات لو الحالة دى عندك شغلى السيفون وبعدين هاتى كوب زبادى فاضى ولمى بيه الميا اللى تحت لحد متفضى وبعدين كبى ميا نار تفور الترسبات وتشيليها بس بعد كده متهمليش الجزء ده وادعكى القاعدة اول باول مش هتلاقى ترسبات خالص
وكمان الحواف اللى حوالين التواليت ادعكيها من جوة لان بيبقى فيها ترسبات بتعمل ريحة وحشة

تعالى بقى للبانيو بنفس الليفه الاولانيه ادعكى البانيو بالكامل ولو حسيتيه مصفر رشيه بالكلور بالكامل وسيبيه شوية واشطفيه ومتنسيش برضه الدش والحنفيه تدعكيهم

شباك الحمام برضه لمعيه متهملهوش ولو عليه تراب بفرشاه ناعمة نفضيه
ستارة البانيو كل فترة كده امسكيها بالطول وادعكى اى بقع عليها واشطفيها علشان متبقاش متربة

حوائط الحمام بمقشه ناعمة نضفى السقف لو عليه خيوط عنكبوت وبعد كده بليفه ادعكى الحوائط كلها لو سيراميك وممكن كمان بالمقشة اسهلك ليكى وادعكى الارضيه برضه بالمقشة وامسحى حمامك اخر شطفة بقى حطى نقطتين ديتول للتعقيم وعلشان تحسى برائحة النضافه

بس اياكى تحطى اى هدوم فى الحمام سواء ليكى او لعيالك ورا الباب ولو فيه سبت للهدوم يبقى هاتيه بغطا

المنظفات هاتى ليها باسكيت شيك وحطيه فيها علشان يبقوا تحت ايديهم

بعد الاستحمام اياكى تسيبى ميا فى الحمام وتسيبيه غرقان نضفيها اول باول علشان الرطوبة والفطريات وعلشان الاطفال وكمان رحمة بللى ساكنين تحتيكى

بلاش الحمام يبقى معرض ادوات منزليه فتسيبى المقشة والمساحة والفرش والجردل فيهم يتشوفى ليهم مكان فى بلكونة او المطبخ ياما لو البيت ضيق رصيهم بطريقة لطيفه

دوسات الحمام اسبوعيا اغسليهم وشمسيهم وافرشيهم

كل يوم لو دعكتى الحوض والقاعدة من اى ترسبات هتحافظى على حمامنك زى الفل وتمنعى عنه الحشرات

كمان البلاعه لازم تقفليها وتجبيلها وش مخرم لانها بتجيب صراصير ونضفى وشها من الشعر واى متخلفات علشان متنزلش وتسدد ليكى البلاعه